Оҕо библиотекатын ааҕааччылара Саха циркатыгар ыалдьыттыылар

Өрөспүүбүлүкэтээҕи оҕо библиотекатыгар саҥа тэриллибит "Библиопес" кулууп араас тэрээһиннэри ыытар. Ол курдук манна сүрүннээн дьиэ кыылларын, түөрт атахтаах доҕоттору кытта көрсүһүүлэр буолаллар. Оҕоҕо ааҕыы сэргэх уонна туһалаах буоларын туһугар "Каштанка" айымньыны ааҕыы чэрчитинэн, саха циркатын ыттарын кытары билистилэр.

Өрөспүүбүлүкэтээҕи оҕо библиотекатын ааҕааччылара Саха циркатыгар ыалдьыттыылар. Манна оҕолорго цирка үлэһиттэрэ кыыллары хайдах иитэллэрин, чуолаан ыттары көрүү-истии кистэлэҥнэрин, кинилэри хайдах эрчийэллэрин туһунан билистилэр. Цирка уопуттаах дрессировщига Мария Жиркова ыттары таһаартаан араас нүөмэрдэри көрдөрдө. Оҕолор сөбүлээн көрөр дьиэ кыылларын цирка сыанатыгар көрөннөр үөрүүлэрэ өссө күүһүрэр.

"Кулууппут бу саас арыллан үлэтин саҕалаабыта. Бырайыак сүрүн сыала соруга, оҕолорго кинигэҕэ тапталы уонна түөрт атахтаах доҕотторбутугар харыстабыллаах сыһыаны иитии буолар. Оҕолорбут цирка ыттарын кытта билсиһэ кэллилэр. Итиэннэ манна кинилэр дресировщик идэтин, А.П. Чехов “Каштанка” айымньытын кытта билсиһиэхтэрэ", - диэн Өрөспүүбүлүкэтээҕи оҕо библиотекатын оҕо ааҕар киинин үлэһитэ Иванна Бурцева сырдатта.

Саҥа тэриллибит "Библиопес" кулууп иитиллээччилэрэ ыттары кытта иккис көрсүһүүлэрэ буолар. Бу манна кэлбит оҕолор бары кэриэтэ түөрт атахтаах доҕордоохтор. Кинилэр номнуо идэтийбит үлэһиттэргэ араас ыйытыктары биэрдилэр. Оҕолор сүрүн болҕомтону ыты иитии уонна эрчийии боппуруоһугар уурдулар. Ол курдук, хас биирдии оҕо бэйэтин ытын эрчийэн, араас албастары оҥорор баҕа санаалаах, онон ыра санааларын толорорго туһуламмыт араас сүбэлэри ыллылар. 

"Кинилэр иннилэригэр аренаҕа биһиги артыыстарбыт, хаскилар, трюктарын, тугу сатыылларын көрдөрдүлэр. Онтон саҥа, эдэр, сотору артыыс буолар ыттарбыт, 3-5 ыйдаах саха лаайкалара көһүннүлэр. Ону тэҥэ, королевскай корги боруодатын кытта билистилэр. Салгыы немецскэй овчарка тугу сатыырын, кинини иитэргэ туох аһылык наадатын, хайдах трюктары сатыырын биһиги дресировщицабыт туох баар секреттарын арыйан, билиитин-көрүүтүн оҕолорго, “Библиопес” бырайыак кыттыылаахтарыгар, кэпсээтэ", - диир Саха судаарыстыбаннай цииркэтин администратора Анастасия Реброва.

"Библиопес" кулууп иитиллээччилэрин сүрүн болҕомтотун корги ыттар ыллылар, кинилэр эрчиллиигэ наадыйбаттар, ол эрэн дьону кытары түргэнник уопсай тылы булаллар. Кыра ыты дьиэҕэ иитэр табыгастаах буолан,   ордук оҕоҕо доҕор курдук илдьэ сылдьарга ордук. Онон хас биирдии оҕо дьиэтигэр кыракый ыты иитэр баҕа санаалаах.

Бу курдук библиотека үлэһиттэрэ араас көрсүһүүлэри тэрийэннэр оскуола оҕолоругар кинигэҕэ, араас айымньыларга тапталы иҥэрэллэр. Оҕолор дьиэ кыылларын сөбүлүүр буоланнар, бу маннык тэрээһиннэр кэннилэриттэн кыыллардаах айымньыларга болҕомтолоро өссө күүһүрэр