Ыам ыйыгар оҕуруоччут сүрүн түбүгэ саҕаланар

Күннэринэн көрөн оҕуруот аһын олордорго, көһөрөргө табыгастаах кэмнэр тураллар. Билигин хас биирдии ыал төһө кыах баарынан бэйэ оҕуруотун олордор. Онтон улахан хаһаайыстыбалар номнуо, теплицаларын оттон оҕуруот астарын көһөртөөбүттэр.

Гелена Менякова оҕуруот аһын үүннэриитинэн дьарыктаммыта 10-ча сыл буолла. 2014 сыллаахтан бааһынай фермерскай хаһаайыстыба тэринэн Тулагы-киллэм нэһилиэгэр тэриллэн улэлии-хамныы олорор. Кини сүрүннээн, оҕуруот аһынан дьарыгырар.

"Олунньу ый ортотуттан сиэмэлэрбин олордон саҕалыыбын. Тоҕо диэтэххинэ, кулун тутар бүтүүтэ пикировкалаан саҕалыыбын. Ол эбэтэр номнуо, муус устартан теплицаларбар кыралаан олордобун. Сыл аайы ураһаай араастаан   биэрэр. Тымныы сыллар, итии сыллар оруолу оонньууллар уонна төһө үчүгэйдик уу кутарбыттан, көрөрбүттэн улахан тутулуктаах. Ортотунан, биир күҥҥэ биир теплицаттан 300 кг курдугу ылабын. Сүрүннэн, 15 теплицаҕа оҕурсу үүннэриллэн турар, 10 теплицаҕа помидор, уоннааҕыта перец, баклажан, кабачок барыта ыһыллан тураллар", - диэн бааһынай тус хаһаайыстыба салайааччыта  Гелена Менякова кэпсиир.

Хаһаайыстыба Өрөспүүбүлүкэ бары кэриэтэ улуустарын оҕуруот аһынан хааччыйар. Якутопторг тэрилтэни кытары сөбүлэҥ түһэрсэн, сылын ахсын хоту улуустары бэйэлэрэ үүннэрбит астарынан хааччыйаллар. Уопсайа быйыл арктика оройуоннарыгар 150 туонна хортуоппуйу, 15 туонна сүбүөкүлэни уонна да атын оҕуруот аһын үүннэрэн туттарар былааннаах. Хас биирдии оҕуоруоччут буоларын курдук үүнээйини көрөр-истэр туспа, ураты көрүүлээх, ньымалаах буолар.

"Бүгүҥҥү күҥҥэ оҕурсулар улаатан тураллар, астара кыралаан бааллар. Бастакы астара таҕыстаҕына, биһиги барытын хомуйабыт. Тоҕо диэтэргин, кэлэр астар түргэнник улааталлар", - диир Гелена Менякова.

Хаһаайыстыба үлэһиттэрэ сотору кэминэн ыһыы үлэтин саҕалаары сылдьаллар. Быйыл дьылбыт хойуутаата дэһэллэр. Уопсайа 30 га сиргэ хортуоска, моркуоп, хаппыыста уонна сүбүөкүлэ олордор былааннаахтар. Бу күннэргэ техникэлэрин көрүнэн, сирдэрин бэлэмнээн саҕалыахтара, онтон дьэ ыһыы үлэтэ тэтимнээхтик саҕаланыаҕа.

Хаһаайыстыба уопсайа 33 теплицалаах, муус устар ый бүтүүтүттэн  теплицаларын оттон, үүнээйилэрин олордотолоон олороллор. Бу күннэргэ хаалбыт теплицаларга барыларыгар рассадаларын көһөрөр сорук турар. Ый бүтүүтэ бастакы астарын ылан амсайыахтара.