"Сайын кэлиитэ" диэн саха таҥаһыгар анаммыт ураты тэрээһин

"Сайын кэлиитэ" диэн саха таҥаһыгар анаммыт ураты тэрээһин  Саха сиригэр аан бастакытын ыытыллынна. Манна култуура уонна иис-уус эйгэтигэр үлэлиир дьон биир түһүлгэҕэ түмүстүлэр.  Тэрээһиҥҥэ олохтоох оҥорон таһаарааччылар, норуот маастардарын холбоһук быыстапка-дьаарбанкалара көрдөрүүгэ туруорулунна.   Онтон улахан сыанаҕа саха мааны таҥаһын айар бастыҥ маастардар, дизайнердар, худуоһунньуктар айан таһаарбыт таҥастара көрөөччү биһирэбилин ылла.

"Атыы-эргиэн эрэ дьаарбанката буолбакка, манна креативнай индустрия, Өрөспүүбүлүкэбит аар-саарга аатырбыт маастардара бука бары мустан кэллилэр. Мода эрэ эйгэтэ буолбатах, тыйаатыр, кулиса кэннигэр саһа сылдьбыт, саамай киэн туттар иистэнньэҥнэрэ, дизайнердара бука бары таҕыстылар", - диир  "Сайын кэлиитэ"  бырайыак тэрийээччитэ Евгения Горденчук.

Элбэх оҕолоох эдэр ийэ Ньургуйаана Дьячковская, туой буорунан айылҕа кэрэтин дьүһүйэн, киэргэллэри оҥорон таһаарар. Эдэр ийэ сөбүлүүр дьарыгынан утумнаахтык дьарыктаммыта ахсыс сыла буолбут.

"Ордук отон, дьэдьэн, сугун ытарҕалары ылаллар. Бэйэм илиибинэн оҥоробун барытын. Элбэх оҕолоох буоллаххына иэйии кэлэрэ биллэр буоллаҕа дии. Инники былааным, салгыы дьарыгыран араас сибэккилэри, отоннору оҥороммун, дьону үөрэтиэхпин баҕарабын. Билигин кыралаан үөрэнэллэр. Дьиэбэр кэлэллэр, дьарыктыыбын", - диэн "Сайын кэлиитэ"  бырайыак  кыттааччыта, маастар Ньургуйаана Дьячковская кэпсээтэ.

Уус Алдан улууһуттан сылдьар Ия Сивцева ииһинэн дьарыктаммыта 30 тахса сыл буолла. Маннык тэрээһиннэргэ куруутун ыҥыраллар, ол эрэн иллэҥим суох буолан кыттыбаппын. Быйыл бириэмэ булан, бэйэм айан таһаарбыт таҥастарбын дьон көрүүтүгэр таһаардым диэн этэр.

"Ийэм дэриэбинэ дьонугар барытыгар түүлээх бэргэһэ тигэр этэ. Мин онус оҕобун, тоҕус кыыспыт. Иннэ гынан, ийэм талаана барыта миэхэ бэриллибит. Кыра эрдэхпиттэн кини аттыгар олорон тигэммин сыстыбыппын. Тириинэн тигэбин. Эдьиийдэрбэр тикпитим 20 сыл буолла. Аныгылыы оҥоро сатыыбын ", - диэн "Сайын кэлиитэ"  бырайыак  кыттааччыта, иистэнньэҥ Ия Сивцева  үллэһиннэ.

Бырайыак саҥа ааттары эмиэ таһаарда. Култуура эйгэтигэр талааннаах дьоммут эргиччи дьоҕурдаахтарын көрдөрдүлэр. Оттон сахалыы уран матыыбынан уйдаран саха сиэдэрэй симэҕин, аныгы моһуоннаах ураты таҥастары  көрдөрүү хатыламмат түгэни бэлэхтээтэ. Инникитин бу тэрээһин үгэс быһыытынан салҕаныаҕа диэн  тэрийээччилэр эрэнэллэр. Саха Сирин талааннаах дьонун, айар куттаах иис эйгэтин өссө да сайыннарар, ар саарга таһаарар соруктаахтар.