Аатырбыт тренер Дмитрий Коркин 95 сааһын көрсө саҥа киинэ

47 сыл аннаараа өттүгэр Монреаль куоракка 21 сайыҥҥы олимпийскай оонньууларга 3 саха уолун өрөгөйдөөх кыайыылара. Хаһан да буолбатах түгэн тосхойон, бүттүүн сэбиэскэй сойуус саха тустуук уолаттарын уруйдуур.

Киинэни Дьокуускайга "Триумф" уораҕайыгар устан саҕалаатылар. Сүрүн оруолларга Гаврил Менкяров, Семен Лукин, Дьулусхан Андросов уонна Дмитрий Коркин оруолун Михаил Лукачевскай толоруохтара. Артыыстар хас да ыйы быһа тустуук, спортсмен көрүҥүн ылаары анал эрчиллиилэри ааспыттар.

"Александр Иванов оруолун толорор ыарахан буоллаҕа. Бэйэҕит билэргит курдук, тустуу туһунан киинэ. Чиэһинэ эттэххинэ, мин тустууга улахан сыһыана суох киһибин. Икки ый устата күүстээх диетаҕа олордубуттара, күн ахсын дьарыктанныбыт. Артыыс маастарыстыбата, тустуу дьарыга  нэдиэлэҕэ биэстэ, алтата, сорох күҥҥэ иккитэ буолла", - диэн Александр Иванов оруолун толорооччу Дьулусхан Андросов кэпсээтэ.

Киинэҕэ араас омуктар оонньуохтара, ол курдук Хотугулуу-Илиҥҥи федеральнай университет устудьуоннара кыттыспыттар. Кимнээх эрэ судьуйа, көрөөччү оруолун толороллор. Онтон Александр Иванов утарсааччытын Юдзи Такаданы Сарыал Кириллин оонньуоҕа.

"Мин оруолум Монреалга Олимпиаданы ылар, бастыыр, күүстээх санаалаах киһи буолар. Японияттан сылдьар самурай буоллаҕа дии. Киирэн бастыыр. Кини киинэҕэ омсолоох дьоруой оруолун толорор. Оннук оруолга киирэбит. Дьоппуоҥҥа син майгынныыр эбиккин диэннэр киирдэҕим", - диир Юдзи Такада оруолун толорооччу Сарыал Кириллин.

Киинэҕэ хас биирдии сыананы кичэйэн туран уһулаллар. Холобур, көстөр каадырдарга Роман Дмитриевка олимпиадаҕа 2 миэстэни ылбытын иһин үрүҥ көмүс мэдээли туттаралларын түгэнэ. Артыыс тас көстүүтэ, туттуута-хаптыыта барыта ол кэмҥэ майгынныахтаах. Киинэни уһулааччылар барытын историческэй өттүттэн үөрэтэн, Павел Пинигинтан, Александр Ивановтан сүбэлэттэрэн уһула сылдьаллар.

"Уопсайынан, боростуой тыа уолаттара Чурапчыттан Аан дойдуга Олимпийскай оонньууларга тиийэн мэтээллэри ылалларын туһунан киинэ. Бу киинэнэн биһиги эдэр ыччакка мотивацияны уонна санааларыгар өрө көтөҕүллүүнү биэриэхпитин баҕарабыт", - диэн киинэ режиссёра Михаил Лукачевскай эттэ.

Саха сирин киинэтин историятыгар аан бастаан пластическай грим ньыматын туһаныахтара, ол курдук Дмитрий Коркин сырайын чопчу бу баардыы ойуулуохтара. Ону таһынан, араас аныгы киинэни устар албастары туһанан көрөөччүнү үөрдүөхтэрэ.

Киинэни Дмитрий Коркин 95 сылыгар, Павел Пинигин 70 сааһыгар уонна Саха сиригэр физкультурнай хамсааһын 100 сылыгар анаатылар. Сотору кэминэн устар бөлөх киин куоракка үлэлэрин бүтэрэн, аны Чурапчыга, Аммаҕа уонна Мииринэйгэ баран устуохтара. Онтон саҥа киинэ көрөөччүгэ бу сыл бүтүүтэ тахсыаҕа.