Саха сиригэр 7 киинэ бырайыагар үбүлээһин көрүлүннэ

Ол курдук, кыайыылаахтары муус устар ыйга ыытыллыбыт күрэх түмүгүнэн таллылар. Уонна бу күннэргэ кинилэргэ үөрүүлээх быһыыга-майгыга сертификаттары туттардылар. Тустаах сүүмэрдиир күрэх өрөспүүбүлүкэҕэ 2020 сыллаахтан ыытыллар. Бу үс сыл иһигэр 20 тахса бырайыак судаарыстыбаттан көмөнү туһанна. Быйыл өрөспүүбүлүкэ бүддьүөтүтэн киинэни сайыннарыыга анаан 20 млн. көрүлүннэ. Уопсайа күрэххэ 18 киинэ режиссера уонна продюсердар кыттыыны ыллылар. 

“Биһиги Өрөспүүбүлүкэбит Ил Дархана сыллата өрөспүүбүлүкэ бүддьүөтүгэр үп-хаччы көрдөрөн, бэйэтин талааннарын арыйыан баҕалаах дьоннорго харчы көрөн, киинэ устуутугар өйөбүл барар. Уопсайа 4 сыл тухары биһиги 24 бырйыагы өйөөтүбүт. Мантан хас даҕаны киинэ көрүүгэ-истиигэ таҕыста. Үүммүт 2023 сылга өссө тахсыахтара. Бу олус суолталаах, Сахабыт сиригэр талааннаах киһи элбэх. Киинэбитин Саха сиригэр эрэ буолбакка, бүтүн Россия дьоно-сэргэтэ биһирээн көрөр буолла. Онон биһиги бу хайысханан үлэни кэҥэтэр, күүһүрдэр сыаллаах-соруктаах маннык күрэхтэри ыытабыт”, - диэн СӨ Бырабыытылыстыбатын Бэрэссэдээтэлин солбуйааччы Сергей Местников иһитиннэрдэ.

Быйыл сүүмэрдиир хамыыһыйа уопсайа 5 хайысханан бырайыактары сыаналаатылар. Ол иһигэр, авторскай киинэ, дебютнай, оҕо киинэтэ, документальнай уонна саха литературатын айымньыларынан бырайыактары көрдүлэр. Оттон сүүмэрдээһини ааспыт киинэлэр прокатка 2024 сылга тахсыахтаахтар