Ойуур баһаарыттан сэрэхтээх буолууга сэрэтэр рейдэлэр

Баһаартан сэрэхтээх буолуу кэмэ биллэриллиэҕиттэн ыла бүтүн өрөспүүбүлүкэ үрдүнэн күннэтэ сэрэтэр рейдэлэр ыытыллаллар. Сүрүн болҕомто айылҕаҕа, тыаҕа тахсан сынньанааччыларга ууруллар. Билигин баһаар тахсыытын сүрүн төрүөтэ - дьон ойуурга уоту сэрэҕэ суох туттуута, айылҕаҕа, тыаҕа сылдьан  дьалаҕай сыһыаннаһыыта буолар.

"ЫБММ сэрэтэр уонна кэтиир салаатын үлэһиттэрэ хас өрөбүл аайы айылҕаҕа тахсан сынньанарга тэриллибит сирдэргэ уоттан сэрэхтээх буоларга сэрэтии үлэтин ыытабыт. Куораппыт олохтоохторугар санатабыт, кураан оту өртүүр, тыаҕа аһаҕас уоту туттар бобуллар. Бэрээдэги кэһэр дьон административнай уонна холуобунай эппиэтинэскэ тардыллаллар", - диэн  ЫБММ кэтиир уонна сэрэтэр үлэ инспектора  Евгений Габышев иһитиннэрдэ.

Ол курдук ыам ыйа саҕаланыаҕыттан Саха сиригэр 400 рейдэ ыытылынна. Манна уопсайа 35 протокол толорулунна, ол иһигэр 5 киһи уоту оттуу быраабылатын иккистээн кэһэн ыстырааптаннылар. Киин куорат таһыгар баар сынньалаҥ баазаларыгар эмиэ болҕомто кытаанах.  Күннэтэ сүүһүнэн киһи ойуурга тахсан уот оттор, онтон сылтаан киин куорат таһыгар кыра-кыралаан баһаардар тахсаллар.

"Айылҕаны харыстыырга дьону үөрэтиэххэ наада, бэрэбиэркэ барыахтаах. Биһиги экология министиэристибэтин кытта тэҥҥэ үлэлэһэбит.  Бэйэбит ыстааппытыгар булт инспиэктэрдээхпит, егерь эмиэ баар. Олору кытта бииргэ сылдьабыт", - диир сынньалаҥ баазатын хаһаайына Тимур Васильев.

Саха сирин үрдүнэн баһаартан сэрэхтээх буолуу кэмэ ыам ыйын 12 күнүгэр биллэриллибитэ, онтон тутатына ыам ыйын 13 күнүгэр Дьокуускай куорат таһыгар бастакы баһаар бэлиэтэммитэ.

Рейдэ кэмигэр бүлүүлүүр суол 15 килэмиэтиригэр баһаар тахсыытын туһунан иһитиннэрии киирэн, хамыыһыйа онно айанныыр. Тутатына миэстэтигэр баһаарынай массыына кэлэр. Төлөппүөнүнэн иһитиннэрбиттэринэн баһаары тутатына умулларбыттар. Бу курдук уот туруутун туһунан күннэтэ иһитиннэриилэр киирэ тураллар. Сүрүн биричиинэ булчуттар уонна сынньанааччылар айылҕаҕа тахсыылара.

Бу маннык хабааннаах рейдэлэр күннэтэ балаҕан ыйыгар диэри ыытыллыахтара. Уопсайа Саха сирин үрдүнэн билиҥҥи туругунан 40 тахса баһаар тахса сылдьыбыта бэлиэтэннэ,  1000 тахса га сир умайда.