Дойду үрдүнэн оскуоланы бүтэрээччилэргэ тиһэх чуораан чугдаарар

33

Өрөспүүбүлүкэҕэ эмиэ выпускниктары олох киэҥ суолугар атаарар үөрүүлээх тэрээһиннэр ыытыллалар. Быйылгы үөрэх дьылыгар Дьокуускай куоракка 2 тыһ. тахса оҕо 11 кылааһы бүтэрэр. Биһиги устар бөлөхпүт Айыы кыһата национальнай гимназия бүтэһик чуорааныгар сырытта. Онно быйыл 74 оҕо оскуоланы бүтэрэр.

Айыы кыһатыгар быйыл тиһэх чуораан сайыны көрсүү күнүн кытта дьүөрэлэспит буолан уратылаах буолла. Соторутааҕыта эрэ үөрэх кыһатын боруогун атыллаабыт  оҕолор бу күн алын оскуоланы бүтэрдилэр. Оттон оскуоланы бүтэрээччилэр  олох улахан суолугар үктэнээри, учууталларын, төрөппүттэрин алгыс тылларын истэллэр.

Оскуола үөрэнээччилэрин маҥнайгы кылаастан сахалыы эйгэҕэ сыһыаран, ийэ тылы харыстыырга үөрэтии, кэскиллээх ыччаты иитии,  оскуола сүрүн соруга. Күн бүгүн оскуолаҕа 1548 оҕо үөрэнэр, онтон 74 оҕо быйыл билии кыһатын бүтэрэн, түмүктүүр тургутууга киирдилэр.

өрөөбүт тылынан үөрэнэр оҕо нууччалыы, английскадыы үчүгэйдик билэр. Саамай сүрүнэ, биһиги оҕолорбут сахалыы тыыны бэйэлэригэр кыра кылаастан илдьэ сылдьаллар. Ийэ тылынан үөрэнэр буоланнар, сүрэхтэригэр-быардарыгар иҥэринэллэр, биһиги саха буолан сандаарын, киһи буолан килбэйин диэн санааны хара маҥнайгыттан олохсута сатыыбыт. Олохторугар ити тыллары, өйү-санааны иҥэриннэхтэринэ, ол биһиги саамай улахан ситиһиибит дии саныыбыт. Былырыыҥҥынан көрдөххө, Илиҥҥи университеттары талаллар. Москваҕа, Санкт-Петербурга, Новосибирскайга, Екатеринбурга, Томскайга бараллар. Үс хайысханан оҕолор үөрэнэллэр, былырыын биир оҕоттон ураты, бары техническэй хайысханан киирбиттэрэ. Гуманнимтарнай хайысханы үрдүк баалга туттардахтарына Санк-Петербурга игин киирэллэр", - диир "Айыы кыһата" национальнай гимназия дириэктэрэ Лидия Шамаева.

Айсена Яковлева тиһэх чуорааныгар олус диэн долгуйа турар.  Кылаастарыгар 28 оҕо баар. Экзаменнарыгар бэлэмнэнэнэн саҕалаабыттара ыраатта. Кини историяны уонна литератураны туттарар. Артыыс идэтигэр үөрэнэ киириэн баҕарар.

"Бу 11 сыл устата мин киһи киһитэ буола улаат диэн эппит тылларынан улааттым диэххэ сөп. Аан бастакы учууталым, Коркина Евгения Дмитриевна,  миигин наһаа үчүгэйдик иитэн-үөрэтэн, такайан таһаарбыта. Айыы кыһата оскуолатын бүтэрбиппиттэн астына, үөрэ сылдьабын. Бастакы эксээмэннэрбит аҕыйах күнүнэн буолуохтаахтар, ол иһин барыбытыгар кыра долгуйуу баар", - диэн "Айыы кыһата" национальнай гимназия 11 кылааһын үөрэнээччитэ Айсена Яковлева кэпсээтэ.

Артур Софронеев оскуолатын бүтэрдэҕинэ геолог идэтигэр үөрэнэ киириэн баҕарар. Бииргэ үөрэнэр оҕолоругар экзаменнарын ситиһилээхтик туттаралларыгар баҕарар. Билиҥҥиттэн оскуолабын ахтан эрэбин диэн этэр.

"Национальнай гимназия буоларын быһыытынан, сахабыт норуотун историятын, үгэһин, култууратын үөрэтэр. Мин профильнай математика, биология уонна нуучча тылын эксээмэнин туттарабын. Улааттахпына эколог буолуом этэ", - диэн "Айыы кыһата" национальнай гимназия 11 кылааһын үөрэнээччитэ Артур Софронеев үллэһиннэ.

Бүтэрээччилэргэ үөрэммит кыһаларыгар тиһэх чуораан чугдаарара ураты долгутуулаах уонна бэлиэ тэрээһин буолар. Аны  аҕыйах хонугунан биир кэлим эксээмэннэри туттарыы түһүмэҕэр киириэхтэрэ. Ол кэнниттэн талбыт идэлэринэн араас эйгэҕэ салҕыы үөрэнэ киириэхтэрэ.  Бастакы тургутуу ыам ыйын 26 күнүгэр буолуоҕа.