Улахан Ааннар сайылыкка көстүлэр

Ньукуолун күнүн бэлиэтиибит. Ону тэҥэ өрөспүүбүлүкэ үрдүнэн Сайылык күнэ. Хаһаайыстыбалар этэҥҥэ кыстаан, номнуо сайылыкка көһөн саҕалаатылар. Быйыл Саха сиригэр уопсайа 348 сайылыкка барыта 40-тан тахса тыһыынча ынах-сүөһү сайылыыра күүтүллэр.

Хаҥалас улууһун Улахан Аан нэһилиэгин фермата, Бөртө сылгы собуотун ынах-сүөһүтэ ааспыт нэдиэлэттэн саҕалаан сайылыкка көстө. 340 ыанар ынах уонна 240 ньирэй Уу Көхсө уонна Куоһаҕас диэн алаастарга сайыҥҥы кэмнэ мэччийиэ. Ону кытта субан сүөһүлэр эмиэ туспа алаастарга сайылыахтара. Барыта биир тыһыынча кэриҥэ хороҕор муостаах этэҥҥэ кыстаан таҕыста.

Ульяна Семенова, "Бөртө" сылгы собуотун биригэдьиирэ: “Ыам ыйын 15 күнүгэр үс сайылыкка уопсайа 340 ынах таҕыста. Онтон 18 чыыһылаҕа 240 ньирэйи икки алааска таһаардыбыт. Онон барыта 980 сүөһү сайылыктарын буллулар”.

Фермаҕа от үүнүөр диэри сиир отторо баар, ол курдук сенажтарын саппааһа тиийэр. Манна сайылыкка тахсан баран ынахтар өссө да төрүү тураллар. Кырачааннар 5 күн устата ийэлэрин эмиэхтэрэ, онтон салгыы ньирэйдэр хамаандаларыгар холбуохтара.

Валентина Федорова, "Бөртө" сылгы собуотун учуоччута: “Биһиги ыам ыйын 15 күнүгэр үчүгэй баҕыйытык көһөн тахсыбыппыт. Сайылыкка көспүппүт кэннэ икки ынах төрөөтө, уонтан тахса ынах сиэмэлэннэ. Манна кэлиэхпититтэн үүппүт эбилиннэ. Алааспыт көҕөрүөхчэ”.

Светлана Васильева, "Бөртө" сылгы собуотун осеменатора: “Кыстыгы этэҥҥэ туораан күөххэ үктэннибит. Ынахтарбыт туруктара үчүгэйдэр. Сиэмэлээһин бара турар”. 

Өрөспүүбүлүкэ үрдүнэн, хаһаайыстыбалар, кэтэхтэр сылы этэҥҥэ кыстаан, сайыны көрсөллөр. Ыам ыйа бүтүөр диэри 10 хонук хаалла. Бүгүҥҥү күҥҥэ, улуустарынан ыллахха, 37 тыһыынчаттан тахса туонна от, сиилэс 3,5 тыһыынча уонна сенаж 1 тыһыычаттан тахса туонналара хаалан турар. Быйылгы кыстык урукку сыллар курдук эмиэ бэрт уустуктук ааста. Ынах-сүөһү уопсай ахсаана ааспыт сылы кытта тэҥнээтэххэ, 6,5 % аҕыйаата, төрөөһүн көрдөрүүтэ былырыыҥҥытынааҕар эмиэ намыһах.

Прокопий Ядрихинскай, ТХМ сүөһү иитиитигэр департаменын сүрүннүүр исписэлииһэ: “Өрөспүүбүлүкэҕэ 203 тыһыынча ынах-сүөһү баар. Мантан 75,3 тыһыынчата ыанар ынах. Күн бүгүн 35 тыһыынча ньирэй төрөөтө. ”

Оттон сылгы ахсаана ааспыт сылы кытта тэҥнээтэххэ кыратык элбээн, уопсайа  197 тыһыынча 403 төбөҕө тэҥнэстэ. Биэ ахсааныттан 27% тахсата төрөөн турар. Быйыл кыһын 31 тыһыынчаттан тахса төбө сылгы эбии аска киирэн кыстаата. Саха сирин үрдүнэн аны сайын 41 тыһыынчаттан тахса ынах-сүөһү сайылыктарынан мэччийиэҕэ. Барыта 300-тэн тахса ыанньык сайылыга уонна уонтан тахса субан сүөһү сайылыга үлэлиэҕэ. Онно 1800 киһи үлэни тэрийиэҕэ, олор истэригэр ыанньыкысыт ахсаана 787 тэҥнэһэр. Тэрээһиннэх хаһаайыстыбалар былаан быһыытынан быйылгы дьылга 87 тыһыынча туонна үүтү ыан бэлэмниэхтээхтэр.