Тулагы хаһаайыстыбатыгар сотору кэминэн оҕурсу ситиэ

Ыам ыйыгар оҕуруоччут сүрүн түбүгэ саҕаланар. Күннэринэн көрөн оҕуруот аһын олордорго, көһөрөргө табыгастаах кэмнэр тураллар. Билигин хас биирдии ыал төһө кыах баарынан бэйэ оҕуруотун олордор. Онтон улахан хаһаайыстыбалар номнуо теплицаларын сылытаннар оҕуруот астарын көһөртөөбүттэр.

Гелена Менякова оҕуруот аһын үүннэриитинэн дьарыктаммыта 10-ча сыл буолла. 2014 сыллаахтан бааһынай фермерскай хаһаайыстыба тэринэн Тулагы-Киллэм нэһилиэгэр тэриллэн үлэлии-хамныы олорор. Кини сүрүннээн оҕуруот аһынан дьарыгарар.

Гелена Менякова, бааһынай тус хаһаайыстыба салайааччыта: "Олунньу ый ортотуттан сиэмэлэрбин олордон барабын. Онтон клун тутарга иһиттэргэ көһөртүүбүн, муус устарга теплицаҕа олордотолуубун. Ортотунан биир теплицаттан 300 киилэ курдугу ылабын. Ол эрэн үүнүү сылыттан уонна харайыыттан улахан тутулуктаах. Барыта 15 теплицаҕа оҕурсу үүннэриллэн турар, 10 теплицаҕа помидор онтон атыттарга перец, баклажан, кабачок ыһыллан туарллар".

Хаһаайыстыба өрөспүүбүлүкэ бары кэриэтэ улуустарын оҕуруот аһынан хааччыйар. "Якутопторг" тэрилтэни кытары сөбүлэҥ түһэрсэн сылын ахсын хоту улуустары бэйэлэрэ үүннэрбит астарынан хааччыйаллар. Уопсайа быйыл Арктика оройуоннарыгар 150 туонна хортуоппуйу, 15 туонна сүбүөкүлэни уонна да атын оҕуруот аһын үүннэрэн туттарар былааннаах. Хас биирдии оҕуоруотчут буоларын курдук үүнээйини көрөр-истэр туспа, ураты көрүүлээх, ньымалаах буолар.

"Оҕурсуларым бастакы астарын туурабын, оччоҕо үөһэ өттө үчүгэйдик астыыр. Хайаан да температуратын тутуһар наадалаах", - диэн оҕуруотчут сүбэлиир.

Хаһаайыстыба үлэһиттэрэ сотору кэминэн ыһыы үлэтин саҕалаары сылдьаллар. "Быйыл дьылбыт хойутаата",- дэһэллэр. Уопсайа 30 га сиргэ хортуоска, моркуоп, хаппыыста уонна сөбүөкүлэ олордор былааннаахтар. Бу күннэргэ техникэлэрин көрүнэн, сирдэрин бэлэмнээн саҕалыахтара, онтон дьэ ыһыы үлэтэ тэтимнээхтик саҕаланыаҕа.

"20 тахса гектарга хортуоска ыһабын. Онтон 5 гектарга хапыыста олордуохпут уонна 2 гектар курдукка сүбүөкүлэ, моркуоп буолуоҕа", - диэн Гелена Менякова этэр.

Хаһаайыстыба уопсайа 33 теплицалаах, муус устар ый бүтүүтүттэн номнуо тенплицаларын сылытан үүнээйилэрин олордон олороллор. Бу күннэргэ хаалбыт рассадаларын көһөрөр сорук турар. Бу ый бүтүүтэ бастакы хомууру амсайыахтара.