Сокуон араҥаччылара

Кэлиҥҥи кэмҥэ медицинэ суһал көмөтүн сулууспатыгар дьон саба түһэрэ бэлиэтэнэр. Аҕыйах хонук иһигэр 3 суһал иһитиннэрии киирэн, Росгвардия байыастара бэрээдэги кэһээччилэри туттулар. Билигин кинилэр хонтуруолларыгар уопсайа 20-тан тахса массыына баар.

Бу бэрт соторутааҕыта Росгвардияҕа иһитиннэрии киирэн, байыастар суһаллык аадырыска тиийэллэр. Ыҥыртарыы  суһал көмө сулууспатыттан киирбит. Эмчиттэргэ итирик туруктаах киһи саба түһэ сатаабыт

Егор Степанов, РФ Росгвардиятын федеральнай сулууспатын Саха сиринээҕи салалтатын биэдимистибэ таһынан харабыллыыр салаатын тутар бөлөҕүн полицейскай-байыаһа, полиция старшината: "Дьуһуурунай  Чусовского уулуссаҕа суһал көмө массыынатыгар көмөнү ыҥырар кнопката тыаһаата диэн биллэрбитэ. Онно тиийбиппит, эр киһи эчэйии ылбытыгар суһал көмө кэлбит, онно итирик аймаҕа медиктэргэ саба түһэ сатаабыт. Ол киһини тутан илдьэ барбыппыт".

Чахчы, кэлиҥҥи кэмҥэ суһал көмө сулууспатын үлэһиттэриттэн суһал иһитиннэрии киириитин көрдөрүүтэ үрдээбитэ бэлиэтэнэр. Манна үксүн дьону быыһыы кэлбит, медик идэлээх дьоммут бэйэлэрин доруобуйаларыгар, олохторугар куттал суоһуур.

Михаил Местников, РФ Росгвардиятын федеральнай сулууспатын Саха сиринээҕи управлениятын биэдэмистибэ таһынан харабыллыыр салаатын  2 ротатын командира, полиция капитана: "Ыйга ортотунан 20-чэлии ыҥырыы киирэр. Онтон ааспыт сылга суһал көмө үлэһиттэригэр  60 тахса түгэҥҥэ көмөнү оҥордубут. 10 тахса киһи эппиэтинэскэ тардылынна".

Манна даҕатан эттэххэ, Росгвардия салалтата суһал көмө сулууспатын кытары 2021 сыллаахтан үлэлэһэр. Аан маҥнай харабыллыыр салаа үлэһиттэрэ 14 массыынаны харабыллыыллара, оттон күн бүгүн 25.

Александр Данилов, РФ Росгвардиятын федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын кииннэммит харабыллыыр пультун салайааччыта, полиция майора: "Медиктар планшеттарыгар баар анал кнопканы баттаан биһиги сулууспабытын ыҥыраллар. Оччоҕо биһиэхэ иһитиннэрии кэлэр, анал бөлөх ыҥырыы киирбит сиригэр суһаллык барар".

Росгвардия харабыллыыр иэнэ улахан. Билигин оннооҕор чааһынай массыынналаах дьон, тимир көлөлөрүгэр Росгвардия байыастарын ыҥырар кнопка туруорар буоллуллар. Ол сүрүн соруга - суоппар айанын кэмигэр араас айдаан, сокуону кэһии түгэнэ тахсыытыгар полиция үлэһиттэрин суһаллык ыҥырыы буолар. Маныаха билигин биэдэмистибэ үлэтин ыыра улаатан үгүс үлэһиттэргэ наадыйар

Наталья Тырахинова, РФ Росгвардиятын федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын каадырдары хааччыйар салаа исписэлииһэ: "Биһиги тэрилтэбитигэр үлэҕэ киирии сүрүн ирдэбилэ – үлэ көрдөнөөччү 18-35 диэри саастаах,  орто толору үөрэхтээх,  сууттамматах уонна холуобунай дьыалаҕа тардылла сылдьыбатах буолуохтаах. Маны таһынан доруобуйатын туруга эмиэ ирдэбилгэ эппиэттиир буолара ирдэнэр. Билиҥҥи туругунан полицейскай, суоппар, водолаз ирдэнэллэр".  

Манна тоһоҕолоон эттэххэ, тустаах биэдэмистибэҕэ сулуспалыы кэлиэн баҕалаах дьону Росгвардия үлэҕэ ыҥырар