Литература түмэлэ нэдиэлэ устата сэргэх бырагырааманы бэлэмнээтэ

Ойуунускай аатынан Литература музейын балаҕаныгар былыргы саха ыалын олоҕун-дьаһаҕын ойуулуур экскурсияҕа ким баҕалааҕы күүтэллэр. Бу сырыыга манна устудьуоннар уонна музейга сөбүлээн сылдьааччылар ыалдьыттаатылар. Көмүлүөк оһох оттуллан, сылаас салгына тула тарҕанан былыргынан бигииргэ дылы буолла. Ньургуйаана Халгаева түмэл быыстапкалыыр салаатын сүрүн үлэһитэ. Кини кэлбит дьоҥҥо балаҕанна кичэллээхтик харалла сытар былыргы үйэтээҕи мал-сал, иһит-хомуос, өбүгэлэрбит оччотооҕу үйэҕэ күннээҕи олохторугар туттар сэптэрин-сэбиргэллэрин туһунан умсугутуулаахтык кэпсиир. Хас биирдии эскпонат  бэйэтигэр элбэх кистэлэҥи иҥэринэ сылдьар урукку кэм кэрэһитэ буолар.  

Ньургуйаана Халгаева, П.А.Ойуунускай аатынан Литературнай музей быыстапкалыыр салаатын сүрүн үлэһитэ: «Бу Ойуунускай олоро сылдьыбыт балаҕанын үтүктэн оҥоруу. Онон Платон Алексеевич олоҕун, оччотооҕу кэми сырдатан кэпсиибит. Маны сэргэ манна сылдьыбыт дьон урукку кэми ахтан-санаан уйадыйан кэпсээн ааһааччылар »

Ойуунускай аатынан Литература музейа 1970 сыллаахха Платон Ойуунускай  манна куоракка дьиэ кэргэнин кытта олоро сылдьыбыт дьиэтигэр аһыллыбыта. Литература түмэлэ буоларын быһыытынан сүрүн сыал сорук - ааҕааччылары, суруйааччылары, көрөөччүлэри кытта ыкса ситимнээх үлэни тэрийии.

Егор Дохунаев, П.А.Ойуунускай аатынан литературнай музей экскурсовода: «Музей диэн биллэн туран олохпут уруккута, онтон олохпут билиҥҥитэ уруккута суох сатаммат. Онон биһиги улахан дьыаланы оҥоро сылдьабыт дии сананабыт. Урукку олохпутун хайаан да билиэхпитин наада билиҥҥи олохпутуен сыанлыыр туһуттан. Ол онно музей туһалыыр».

Быйыл Дьокуускайга аан бастакытын музей Аан дойдутааҕы күнүн көрсө түмэл нэдиэлэтин тэрийэн ыыталлар. Литература музейа тэрээһиннэргэ көхтөөх кыттыыны ылан, баай, кэрэхсэбиллэх бырагырааманы бэлэмнээбит. Ол курдук биллиилээх улахан суруйааччыларбыт тутта сылдьыбыт сэһэннээх эскпонаттарын туһунан кэпсиэхтэрэ. Манна музейга Өксөкүлээх Өлөксөй иистэнэр массыыната, суруйар чернильницата  итиэннэ Ойуунускай дьиэтигэр ыйаан турбут чаһытын, кириэһилэтин көрүөххэ сөп. Маны тэҥэ остуоруйа күрэҕин тэҥэ, буойун суруйааччы Тимофей Сметанин «Мэхээлэчээн булчут» кэпсээннэригэр олоҕурбут виртуальнай оонньууну сүрэхтиэхтэрэ. 

Линда Иванова, П.А.Ойуунускай аатынан литературнай музей дириэктэрин солбуйааччы: «Биллэн турар, бу оонньуунан эрэ муҥурдаммаппыт. Билиҥҥи ыччат бары компьютерга сыстаҕас, ол иһин оҕолору музейга чугаһатаарыбыт, литература музейа буоларбыт быһыытынан сахалыы литератураны ааҕыахтарын наада диэн,  бу оонньууну толкуйдаабыппыт. Онтубут олоххо киирэн, бастакы хардыы оҥоһулунна. Онтон олус үөрэбит».

Бу ураты бырайыак тылы сайыннарыы судаарыстыбыннай бырагырааматын үбүлээһинин көмөтүнэн олоххо киирдэ. Онон музей аныгы кэми кытта тэҥҥэ хардыылаан, саҥа технологияны баһылаан, сахалыы ис хоһоонноох виртуальнай оонньууну эдэркээн көрөөччүлэргэ ыам ыйын 19 күнүгэр бэлэх уунуоҕа.