Кусчуттарга рейдэлэр

Түүн 12 чаас саҕана булчуттар дьэ кустары саамай манаһар кэмнэрэ. Ону тэҥэ инспектордар быраабыланы, сокуону кэһэр кусчуттары кэтииллэр. Элбэх үҥсүү киирбит сиригэр тиийэн, ким ханан олорорун, туох-ханна баарын үөрэтэллэр уонна дьэ олорон эрэ түүн хараҥарарын күүтэллэр.

Киэһэ борук-сорукка эмиэ кусчуттар күөллэрин таһыгар олороллор. Дьокуускай куорат олохтооҕо Андрей Петров олоҕун тухары хоту бултаһа сылдьыбыт, билигин кэнники кэмҥэ сааһыран чугастыы куорат эргин сылдьар. Иниспиэктэрдэр, кусчут саатын, докумуонун бэрэбиэркэлээн баран, кэһиини булбатылар.

Андрей Петров, Дьокуускай куорат олохтооҕо, булчут: «Бүгүн түүн эрэ ыттылар. Ол иннинэ аҕыйах баар этэ. Ити хайа аннынан ытыалаатылар».

Киэһэ 10-11 чаас диэки булчуттар бары кэриэтэ кус-хаас саҥатын үтүктэр анал тэриллэрин холбууллар, ону тэҥэ иниспиэктэрдэр хомунан баран дьэ сокуону кэһээччилэр диэки туруналлар. Өр кэмнээҕи иһиллээһин, үөмээһин түмүгэр бобуулаах электроманогунан туһана сылдьар киһини туталлар.

Иниспиэктэрдэр эмискэччи баар буола түспүүттэригэр киһибит соһуйан олорон эрэ хаалла. Айылҕа баайын дирекциятын үлэһиттэрэ тутатына барытын, туоһу баар буоларын гына, камераҕа уһулан иһэллэр.

Касьян Новгородов, Айылҕа баайын дирекциятын сүрүн исписэлииһэ: «Кинилэр буруйу кэһиилэрин туоһулуур гына камераҕа устабыт уонна оҥоһуллубут матырыйаалы барытын суукка ыытабыт».

Тутатына ханна да тэйбэккэ, барбакка протокол толоруллар уонна 3 күн устата быраабыланы кэспит дьон дьыалата суукка киирэр. Онон булт кэмигэр сокуону кэһээччилэргэ хонтуруол күүскэ турар. Онтон тутуллубут дьон араастаан көрдөһөн-ааттаһан эппиэтинэстэн куота сатыыллар. Быраабыланы кэһээччи “саҥардыы кэллим, куһу өлөрбөтүм” диэн кэпсиир, ол эрэн кини олорбут сиригэр кус түүтэ, ытыллыбыт ботуруон хаалара сыталлар.

Иннокентий Слепцов, Айылҕа баайын дирекциятын булт салаатын салайааччыта: «Кус саҥатын үтүктэр тэрили тутта олорорун туттубут. Булчут маннык тэрили туттар буоллаҕына административнай эппиэтинэскэ тардыллар».

Билиҥҥи кэмҥэ дьон барыта дөкүмүөннээх, бултка көҥүллээх сылдьар, онтон аҕыйах сыллааҕыта көҥүлэ, докумуона суох сылдьааччы элбэҕэ. Онон сотору кэминэн электромоногу бу курдук күүскэ хонтуруолга туттахтарына эмиэ быраабыланы кэһээччи аҕыйыыр чинчилээх.

Кус-хаас саҥатын үтүктэр тэрил сокуонунан бобуулаах. Арай наука эрэ өттүнэн туһанар көҥүл. Онтон рейдэ кэмигэр маннык биир тэрили иниспиэктэрдэр былдьаатылар.

Бу маннык рейдэлэр түүннэри-күнүстэри булт сезона бүтүөр диэри ыытыллыахтара, онон иниспиэктэрдэр сокуону, быраабыланы кэспэккэ бултуулларыгар ыҥыраллар.