Суол абырахтааһына түүннэри-күнүстэри барар

Быйыл киин куоракка суол өрөмүөнэ эрдэттэн саҕаланан ыытылла турар. Ыам ыйын 6 күнүттэн уулуссаларынан дьаамалары оҥоро сылдьаллар. Биир бастакынан куорат биир саамай уһун, элбэх сырыылаах - Лермонтов аатынан суол тоҕута түһүүлэрин, дьаамаларын кутан, тэҥнииллэр. Сүрүн сыал-сорук - балтараа ый иһигэр 16 тыһыынчаттан тахса миэтэрэ уһуннаах алдьаммыт-кээһэммит суоллары абырахтыахтаахтар.

Маныаха биир күҥҥэ сэттэҕэ тиийэ биригээдэ тахсан үлэлиир-хамныыр. Иккис нэдиэлэтин үлэ күннэтэ күөстүү оргуйар. Бүлүү улууһуттан төрүттээх 81 сааһыгар сылдьар Иван Чемпоров бу эргин олорор. Үйэтин тухары ойуур хаһаайыстыбатын тэрилтэтигэр үлэлээбит кырдьаҕас кыһыннары-сайыннары хас сарсыарда ахсын хаалыктаах хаамыынан үлүһүйэр. Сайсары күөл эргин наар хаамаар,сылдьар буолан суол туругун үчүгэйдик билэр.

Иван Чемпоров ,  Дьокуускай олохтооҕо “Суолбут Сайсары оройуонугар, уопсайынан кытыы сиргэ аһары куһаҕан. Сааскы ууга үгүс суоппар массыынатын алдьатта. Сатыы да сылдьарга олус куһаҕан этэ. Онтон билигин үлэһиттэр самаан-ибээн оҥороллор, кинилэргэ махтал”.

Дьаамалары абырахтыыр өрөмүөн Хабаров, Ойуунускай уулуссаларыттан саҕаланан барбыта. Маны тэҥэ порт эргин оройуоҥҥа эмиэ ыытыллыбыта. Өрөмүөн саҕаланыан иннинэ кутуллуохтаах учаастагы хаһан, ыраастаан бэлэмнииллэр. Сүрүннээн бу үлэни күн-дьыл туругуттан түүҥҥү өттүгэр ыыталлар.

Хас биирдии оҥоһуллуохтаах эбийиэккэ ирдэбил быһыытынан тустаах бэлиэ хайаан да туруораллар. Эрбээн, таас кутан баран биирдэ асфальт куталлар. Холобура, 15 туонналааах икки массыына асфальт 200 квадрат иэҥҥэ эрэ тиийэр эбит. 

Айтал Семёнов, “Якутдорстрой” тэрилтэҕэ суол маастара “Уопсайа 800 квадратнай миэтэрэни оҥордубут. Хабарова, Богатырева, Курнатовского уонна Гагарина уулуссаларга оҥорбуппут.  Тууҥҥү уонна күнүскү биригээдэлэр диэн бааллар. Түүн түөрт киһи сылдьар”.

Оттон капитальнай өрөмүөнү ылар эбит буоллахха, быйыл киин куоракка уопсайа 17 уулуссаны оннуттан саҥардан бириэхтэрэ, ол эбэтэр уопсайа 22 километры оҥоруохтара. 17 эбиийэктэн 10-нун бу сылга бүтэриэхтэрэ, онтон хаалбыт 7-тэ кэлэр сылга көһөн салгыы өрөмүөннэниэҕэ. Улахан болҕомто куорат киинигэр сытар уулуссаларга эрэ буолбакка, кытыы оройуон суолларыгар эмиэ ууруллар. Бэлиэтээн эттэххэ, “Куттала суох хаачыстыбалаах массыына суоллара” национальнай бырайыак 2019 сыллаахтан олоххо киирбитэ. Ол кэмҥэ куорат уонна куорат таһынааҕы бөһүөлэктэр суолларын 30% эрэ нуормаҕа эппиэттиирэ. Онтон 2024 сылга диэри бу көрдөрүү үрдээн 80% диэри тиийиэхтээх.