Сатабыллаах салайааччы, утумнаах уһуйааччы
Үлэ сылыгар үтүө холобур буолар туруу үлэһит дьону сырдатыы - сыл биир сүрүн соруга. Таатта улууһун сибээһин сайдыытыгар үйэ аҥарын кэриэтэ үлэлиир Иван Барбасытов сатабыллаах салайааччы, утумнаах уһуйааччы. Кини салалтатынан улууска интернет ситимэ бигэтик үлэлиир, күөх экран, радио кээһэниитэ суох сырдатар.
Ытык Күөл интернет ситимин тэбэр сүрэҕэ. Уопсайа барыта 250 тахса абонент бу хос иһиттэн баараҕай ситимҥэ холбонор. Мантан өссө нэһилиэктэргэ тарҕанар, уопсайа улуус үрдүнэн барыта тыһыынчаттан тахса туһанааччы баар. Иван Иванович Барбасытов сибээс эйгэтигэр 43 сыл стажтаах, уопуттаах салайааччы. Таатта улууһа куйаар ситимигэр кини тус салайыытынан холбоммута. Телерадиомеханиктан саҕалаабыт сибээс сайдыытын бары кэрдииһин көрбүт исписэлиис "билигин үлэлииргэ өссө интэриэһинэй буолла" диэн этэр.
"Билигин сибээһин уларыйа турар, онно үөрэнэн иһиэххэ наада. Холобур, урут биһиги дьиэ иһигэр сылдьар буоллахпытына, билигин остуолбаҕа ыктар буоллубут. Ол тахсан оптоволоконнай лиинийэни тардабыт нэһилиэк иһигэр. Урут оннук диэн суоҕа. Ити улахан уларыйыы", - диир АУо "АрктикТелеком" Тааттатааҕы салаатын салайааччыта Иван Барбасытов.
Иван Иванович бэйэтэ Кыйы нэһилиэгиттэн төрүттээх. Дьокуускайдааҕы техническэй училищены бүтэрээт, Ытык күөлгэ саҥа тэриллбит телевидение станциятыгар механигынан үлэлии киирбитэ. Онтон ыла биир күн тохтообокко төрөөбүт улууһун сиэбээһин сайдыытыгар үлэлиир. Иван Иванович үлэтин дэгиттэр баһылыыр салайааччы эрэ буолбатах, кини хас да көлүөнэ эдэр исписэлииһи иитэн - үөрэтэн таһаарда:
"Сибээс техникумуттан үөрэнэн кэлбит оҕолор буолан, билбэттэрэ элбэх этэ. Ону аан бастаан сапчаас ылан телевизоры өрөмүөннээн, хаһан даҕаны дьуһуурустубаҕа кэллэххитинэ таах олоруман, тугу эмит оҥорун диэн буолааччы. Онтон дьэ оннук гынан, дьонум үлэлээн бардылар. Станция электроникатыгар сыстан, барытын оҥорон, көрөн-истэн барбыттара".
Сибээс үлэһиттэрэ хайдах курдук уустук усулуобуйаҕа үлэлииллэрин кэпсээбэт идэлээхтэр. Кинилэр сылы эргиччи 50 да кыраадыс тымныыга күөх экран умуллубатын, интернет ситимэ арахсыбатын туһугар үлэлииллэр. Маныаха, биллэн турар, хамаанда үлэтиттэн улахан тутулуктаах. Талан ылбыт идэтигэр бэриниилээх Иван Иванович үлэлиир сылларын тухары чиҥ хамаанданы тэриннэ.
"Хамаандаҕар биир киһи итэҕэс буоллаҕына, үлэлиир-хамсыыр ыарахан. Хас биирдии киһи санаата атын-атын буолар. Онтон уопсай түмүккэ кэлэн, биир сүбэнэн үлэбитин маннык оҥоруохха диэн сөбүлэһэбит", - диэн Иван Барбасытов этэр.
Билигин Таатта улууһугар нэһилиэктэригэр интернет ситимин тупсарыы үлэтэ барар. Уопсайынан Таатта улууһугар сибээс бары көрүҥүн олоххо киллэриигэ Иван Барбасытов кыттыылаах, онон биир дойдулаахтара мээнэҕэ номоххо киирэр киһибит диэбэттэр. Олоҕу кытта тэҥҥэ хардыылыыр салайааччы хамаандата куруутун инники.
