Маҥан халааттаах үрүҥ аанньаллар

47

Ыам ыйын 12 күнүгэр аан дойду үрдүнэн медицина сиэстирэлэрин күнүн бэлиэтээтилэр. Бу идэ доруобуйа харыстабылын систиэмэтигэр саамай элбэх дьонноох буолар. Кинилэрэ суох ханнык да эпэрээссийэ, эмтээһин, ыарыһахтары көрүү-истии сатаммат.

Маҥан халааттаах үрүҥ аанньаллар, кинилэр сымнаҕас илиилэринэн укуол туруоруутуттан саҕалаан, киһини өрөһүйэр араас көмө оҥоһуллар. Бүөр уонна диализ аныгы киинигэр уопуттаах, дьон-сэргэ махталын ылбыт медициинэ сиэстэрэлэрэ үлэлииллэр. Бу кииҥҥэ уопсайа 13 сиэстэрэ баар, кинилэр бары үрдүкү категориялаах, дириҥ-баай уопуттаах дьон.

"Биһиги сиэстирэлэрбит атын сиэстирэлэртэн сүрүн уратылара диэн, чопчу диалезка сылдьар дьоҥҥо сөптөөх сыһыан булаллар. Кинилэр сатабылларыттан бу процедура хайдах ааһара улахан тутулуктаах. Саамай сүрүнэ, ыарахан медициинэ аппараатын кытта күн ахсын үлэлииллэр", - диэн  Бүөр уонна диализ аныгы киинин сүрүн медицинскэй сиэстэрэтэ Туяра Протопопова санаатын үллэһиннэ.

Сиэстэрэлэр аан бастаан кэлэн бараннар дьон хаанын, бүөрүн сайҕатар, ыраастатар миэстэлэрин бэлэмнииллэр. Уонна биллэн турар ыарыһаҕы кытта быһаччы алтыһар, көмө буолар аналлаахтарынан киһини кытта сыһыаннарыгар ордук болҕомтолоохтор.

"Хас биирдии эмтэнээччигэ биһиги ыраастаммыт нобуордары холбуубут.  Анал остуоллаахтар уонна барыта биирдэ туттуллар матырыйаалынан үлэлиибит. Сиэстирэлэр эрдэ кэлэн аппарааттары бэлэмнииллэр. Онтон дьону көрсөллөр уонна аппараакка холбууллар", - диир Бүөр уонна диализ аныгы киинин аҕа медицинскэй сиэстэрэтэ  Саргылаана Макарова.

Хааны ыраастыыр тэрил "Бакстер" диэн ааттаах аныгы кэм ирдэбилигэр эппиэттиир аппарат буолар. Бу аппаракка дьон 4 чаас устата сыталлар, ол бириэмэ тухары сиэстэрэлэр ыарыһахтары кэтииллэр.

Ыарыһахтар күн көтө-көтө хааннарын ыраастата кэлэллэр. Процедура бара турар кэмигэр турар да, олорор да кыаллыбат. Онон кинилэргэ сыталларыгар туох баар усулуобуйа олохтоммут.

Быраастар эркин курдук эрэнэр дьонноро - сиэстэрэлэр. Кинилэр үлэлэригэр, кинилэр сылаас сыһыаннарыгар өрүүтүн эмтэнээччилэр да эмтээччилэр махтал тылларын аныыллар.

"Доруобуйа харыстабылын эйгэтигэр алҕас кэлбит дьон суох. Бары биир сомоҕо буолан үлэлиибит", - диэн Бүөр уонна диализ аныгы киинин сэбиэдиссэйэ Прокопий Давыдов этэр.

"Бары олус аламаҕайдар. Наһаа үчүгэйдик сыһыаннаһан көрө-истэ сылдьаллар", - диир эмтэнээччи Фёдор Туркин.

Флоренс Найтингейл Англияҕа аан бастаан медицинэ сиэстэрэлэрин сулууспатын арыйбыта, онтон 1965 сыллаахтан медицина сиэстэрэлэрин күнүн бэлиэтиир буолбуттара. Бу бэлиэ күн Саха сиригэр 12 тыһыынчаттан тахса сиэстэрэни түмэр уонна кинилэр сыралаах үлэлэригэр дьон болҕомтотун тардар.