Дьокуускайга Дойду президенин көмөлөһөөччүтэ Максим Орешкин үлэлээтэ

25

Дьокуускайга Россия президенин Владимир Путин көмөлөһөөччүтэ Максим Орешкин үлэлээтэ. Кини үлэтинэн сырыытыгар Дьокуускайга уонна Нерюнгрига сылдьан маастар-былааннары олоххо киллэриинэн сүбэ мунньахтары тэрийдэ. Маны таһынан, былааҥҥа киирэр кэккэ эбийиэктэри көрдө уонна Айти Паарка үлэтин кытта билистэ.

Дьокуускайга Дойду президенин көмөлөһөөччүтэ Максим Орешкин үлэлээтэ. Кэлээтин утаа "Дьокуускай" айти-пааркатын үлэтин кытта билистэ. Паарка бырайыактарын резиденнэрэ бэйэлэрин бородууксуйаларын көрдөрдүлэр. Баһаары утары үлэлиир "Сильван систиэмэни, паром сырыытын кэтиир, хоту сиргэ таһаҕаһы тиэрдиини үөрэтэр бырайыактарын, "Сахадрон" хампаанньа пилота суох көтөр аппарааттарын, онтон да атын сэргэх оҥоһуктарын билиһиннэрдилэр.

"Биһиги инники былааммыт, дрону Саха сиригэр сайыннарыы. Холобур, ыйга араас хайысханан 200 дрону оҥоруохпутун баҕарабыт. Тыа хаһаайыстыбатыттан саҕалаан логистикаҕа тиийэр дроннары. Хотугу улуустар кыһыҥҥы суоллаахтар, сайыҥҥы суоллара суох. Ол курдук,  дронунан таһаҕас тиэйтиитин оҥорор санаа баар.  80 км иһигэр биһиги дроммут наадалаах эмптэри, кыра маллары илдьэргэ көмө буолуохтаах", - диэн "Сахадрон" хампаанньа салайааччыта Владимир Дегтярев.

Президент көмөлөһөөччүтэ салгыы "Үлэ кыбаартала" креативнай кластер үлэтин көрдө. Өрөспүүбүлүкэ айан таһаарааччыларын бырайыактарын билистэ. Ордук медиабырайыктары сэҥээрдэ. Уһук Илиҥҥэ соҕотох виртуальнай киинэ павильонугар сылдьан "Экстра Синема" цифровай платформаны интэриэһиргээтэ. Ыалдьыкка анаан "Туундара" ойуулук оҥорор студия бырайыагын сүрэхтээтэ. Ону тэҥэ, Арктикатааҕы култуура уонна искусство института улахан быыстапканы тэрийэн туруорда. 

Дьокуускай куорат маастар-былааны олоххо киллэриитигэр анаан мунньах ыытта. Ол иитинэн маастар-былааҥҥа киирбит 17-с кыбаарталы көрдө. Бастатан туран сүрүн болҕомто 2030 сылга диэри олохтоохтору көһөрүүгэ уонна саҥа тутуллуохтаах микрооройуон инфраструктуратыгар болҕомто ууруллуо диэн Ил Дархан иһитиннэрдэ. Ону тэҥэ маастар-былаан бырагырааматынан Өлүөнэ муостата тутуллан киириэ диэн президент көмөлөһөөччүтэ мэктиэлээтэ.

Максим Орешкин быйыл 30 сылын үлэлии турар Музыка үрдүкү оскуолатыгар сырытта.  Кыһа материальнай-техническэй баазатын, үөрэх дьиэтин, олорор усулуобуйаларын көрдө. Эһиилгиттэн саҕалаан 240 миэстэлээх оскуола уонна 150 миэстэлээх интэринээт тутуллан киириэхтээх диэн Ил Дархан Айсен Николаев иһитиннэрдэ. Билигин музыка оскуолатыгар 1-11 кылаастарга барыта 265 оҕо уһуйуллар. 

"Биһиги искусствобытыгар, норуоппутугар туһаны таһаарар тэрилтэбит дии саныыбыт. Ону суолта биэрэн, биһиэхэ кэлэн барбыттарыттан астынабыт. Оҕолорбут кэнсиэрдэрин дуоһуйа көрдүлэр. Тутуу барара буолуо диэн эрэнэбит", - диир СӨ В. А. Босиков аатынан Музыка үрдүкү оскуолатын ректора Надежда Зайкова.

Максим Орешкин үлэтин сырыытынан Хотугулуу-Илиҥҥи федеральнай университекка сылдьан саҥа лабораториялары көрдө, преподавателлэри уонна устудьуоннары кытта көрсөн кэпсэттэ.

"Биһиги икки улахан лабороторнай кииннэрбитин көрдөрдүбүт. Ити сайдыыга   инникилээх лабораторияларбыт. Чугас кэминэн биһиги үлэлэрбит  оҥорон таһаарыга тахсыахтарын сөп. Ол көрдөрүүбүт үөртэ. Устудьуоннар аһаҕас кэпсэтиигэ элбэх ыйытыгы биэрдилэр. Президеммит көмөлөһөөччүтэ сиһилии кэпсээтэ. Мин санаабар, унивеситеппыт киниэхэ үчүгэй өдөбүлү хаалларда ", - диэн М. К. Аммосов аатынан Хотугулуу-Илиҥҥи федеральнай университет ректора Анатолий Алексеев иһитиннэрдэ.

Дойду президенин көмөлөһөөччүтэ Максим Орешкин үлэтин сырыытынан Саха сиригэр маастар-былааны олоххо киллэриигэ бэлэмнэнии үлэтэ тэрээһиннээхтик саҕаламмытын бэлиэтээтэ. Дойдубут дьоно биир тэҥ үчүгэй усулуобуйаҕа олороллорун туһугар Россия бары куораттарын сайыннарарга улахан болҕомто ууруллар диэн эттэ.