Кырыымчык үптээх дьиэ кэргэн судаарыстыбаттан көмө харчы ылар кыахтаах

Кырыымчык үптээх статустаах дьиэ кэргэн социальнай хантараак түһэрсэн, эбии үп аахсан бэйэ дьыалатын арыныан сөп. Мэҥэ Хаҥалас улууһун Хаптаҕай нэһилиэгин олохтоохторо, элбэх оҕолоох Игнатьевтар дьиэ кэргэн, социальнай хантараактан саҕалаан бэйэлэрэ дьоҕус мастарскыай тэрийэн үлэлэтэллэр.

Игнатьевтар дьиэ кэргэн ааспыт 2022 сылга "Сыл ыала" бүтүн Өрөспүүбүлүкэтээҕи дьиэ кэргэн күрэҕэр "Элбэх оҕолоох ыал" номинацияҕа кыайыыны ситиһэн тураллар. Бастаан бэйэлэрин улуустарыгар, онтон салгыы Сахабыт сирин таһымыгар бастыҥ дьиэ кэргэн үрдүкү аатын ылар чиэскэ тиксибиттэрэ. Татьяна Витальевна, Михаил Михайлович 6 оҕолоохтор. Улахан кыыстара устудьуон, уоннааҕылара оскуола үөрэнээччилэрэ, уһуйаан иитиллээччилэрэ.

2017 сыллаахтан Игнатьевтар дьиэ кэргэн бэйэ дьыалатын – дьоҕус мастарыскыай тэринэн үлэлииллэр. Маһынан миэбэл оҥоруунан ылсан дьарыктаналлар. Уус ыал олороро харахха тута быраҕыллар: дьиэлэрин олбуордарыттан саҕалаан барыта уурбут-туппут курдук уран оһуорунан киэргэммитэ көрүөххэ астык. Аан бастаан социальнай хантараак көмөтүнэн, салгыы ийэ хапытаалын үбүнэн мастарскыай туттан, инструмент атыылаһан дьон сакааһынан миэбэл, дьиэ тэрилин, декор оҥороллор.

“Миэбэл – олоппос, ыскамыйа, остуол, хаптаһын быыс оҥоробут”, - диир ыал аҕата  Михаил Игнатьев.

Улахан оҕолор үөрэхтэриттэн быыс буллулар эрэ дьонноругар көмөлөһөллөр. Хайыы үйэҕэ инструменнарынан сатаан туттан туһа дьонноро. Игнатьевтар оҕолорун кыраларыттан үлэҕэ сыһыаран иитэллэр.

Ааспыт 2022 сылга Дьокуускай үрдүнэн бу курдук социальнай хантараак нөҥүө бэйэ дьыалытын 206 ыал аһар кыахтаммыта, бэйэ кэтэх хаһаайыстыбатын 17 дьиэ кэргэн тэриммитэ, үлэ көрдөнөрүгэр уонна ыарахан балаһыанньаҕа түбэспиттэргэ эмиэ харчынан көмө оҥоһуллубута. Барыта биир тыһыынчаттан тахса ыал социальнай хантыраак түһэрсэн хабыллыбыта.  Быйылгы сылга бу хайысхаҕа биир кэлим босуобуйа олоххо киирэн уларыйыылар бааллар.

“Саамай улахан кээмэйин, бу 100 быраһыаннаах биир кэлим төлөбүрү ылар дьиэ кэргэннэр, 2023 сылга биһиги управлениебытыгар саҥа анал программаҕа сайабылыанньа биэриэхтэрин сөп. Тустаах программа оҕону сайыннарыыга аналлаах. Ол аата дьиэ кэргэн оҕону спортивнай куруһуоктарга, оҕону сайыннарар секцияларга суруйтарыан сөп”, - диэн Дьокуускай куорат нэһилиэнньэтин социальнай харалтаҕа салалтатын начальнига Семён Матвеев иһитиннэрдэ.

Бу көмө кээмэйэ - тииһинэн олоруу ыйдааҕы кээмэйин аҥара, хас оҕо ахсаанынан биирдэ бэриллэр. Өссө биир тустаах саҥа программанан инбэлиитинэстээх дьоҥҥо көмө буолар. Кинилэр социальнай хантыраак сүрүн хайысхаларынан, бэйэ дьыалатын биитэр, бэйэ кэтэх хаһаайыстабатын, судургутуллубут усулуобуйанан арыныахтарын  сөп.