Кроссфит диэн спорт көрүҥэ Саха сиригэр кэнники кэмнэ тэнийдэ

Халлааммыт биллэ сылыйан уулуссаҕа спордунан дьарыктанар дьон ахсаана элбээтэ. Оттон Триумф спортивнай комплекс уораҕайыгар Бөҕөс спортивнай кулууп бэйэтин дьарыгын дьыл кэмиттэн тутулуга суох ыытар. Спорду, чуолаан билиҥҥи кэмҥэ сайдыбыт, кроссфиты күннэтэ олох нуормата оҥостубут спортсеннарга Уйгулаана Николаева ыалдьыттаата.

Кроссфит диэн спорт көрүҥэ Саха сиригэр кэнники кэмҥэ  тэнийдэ. Өрөспүүбүлүкэбитигэр спорду идэ оҥостон дьарыктанар, чөл олоҕу өрө туппут дьон ахсаана күнтэн күн элбээн иһэр. Олортон биирдэстэрэ, Иван Никифоров, бу көрүҥү баһылаан иккис сылын утумнаахтык  дьарыктанар. Кини билигин "Бөҕөс" спорт кулуубка тренер буолар.

"Үксүн дьон, кроссфит ыарахан дии саныыллар. Оннук буолбатах, хас биирдии иитиллээчигэ тус сыһыан баар буолар. Син биир киһи арааһынай. Сорохтор мөлтөхтөр, сорохтор айылҕаттан айдарыылаахтар диэбит курдук. Барыта кыраттан саҕаланар. Техника туруорабыт, онтон кыра-кыралаан баран иһэр", - диир "Бөҕөс" спортивнай кулууп тренера, мас тардыһыытыгар СӨ спордун маастара Иван Никифоров.

Бу хайысхаҕа идэтийбит спортсменнар эрэ буолбакка, оскуола оҕолоро эмиэ дьарыктаналлар. Кыра саастан оҕону сөпкө спортка сыһыараллара, оҕо үүнэн-сайдан тахсарыгар биир улахан тирэх буолар диэн бэлиэтииллэр. Ол курдук толкуйа түргээтиир, күннээҕи режимэ, аһылыга көнөн, күнэ бэрт үтүө түбүктээх буолар. Биир интэриэстээх дьон мустан иллэн бириэмэлэрин туһалаахтык атаараллара хайа да өттүттэн туһалааҕын бэлиэтииллэр.

"Уопсай бөлөхтөргө эйэлии сыһыан баар. Бэйэ бэйэни өйөөһүн, ким да кими да сэнээбэт, күлүү гыммат. Күүстээх үлэ кэнниттэн тыын таһаара кэлэллэр. Ханна эрэ уулуссаҕа быстахха былдьаныах кэриэтэ, заалга кэлэн күүскүн , кыаххын, кыһыыгын таһаарбытын быдан ордук буоллаҕа. Онно саамай сөптөөх кроссфит дии саныыбын. Тоҕо диэтэххинэ, барыта баар. Ким сүүрүүгэ, ким тимиргэ күүстээх, эбэтэр гимнастикаҕа кыаҕын көрдөрөр ", - диэн  "Бөҕөс" спортивнай кулууп тренерэ, атлет Василий Каратаев этэр.

Уопсайа күн аайы 100-тэн тахса киһи кэлэн дьарыктанан барар эбит. Ол быыһыгар кэрэ аҥаардар эмиэ бааллар. Оттон саамай аҕа саастаах иитиллээччи быйыл 60-с хаарын санныгар уулларбыт. Эрдэ бэлиэтээн аһарбыттарын курдук, дьон бастаан заалга кэлэрин кыбыстар буоллаҕына, дьарыктанан истэҕин аайы бэйэтигэр эрэлэ үрдүүр,   кимтэн да уратыта суоҕун билэн арыллан барар.

Барыта кыраттан саҕаланар, ол курдук кулууп иитиллээччилэрэ Дойду таһымнаах араас күрэхтэргэ бэйэлэрин тургутан турардаахтар. Атын омук бөҕөстөрүн кытта кыахтарын, күүстэрин тэҥнээн иннилэрин биэрбэтэх түгэннэрдээхтэр.

Дьиҥнээх эр санааны тургутан көрүү, киһи этэ-сиинэ хайдах таһымҥа диэри сайдыан сөбүн билэ кэлбит киһи элбэх. Таһыттан уҥуохтарынан кыра, 100 киилэни кыайыа суох көрүҥнээх эбит буоллахтарына, сылы быһа күүскэ эрчиллибит эт-сиин ону билиммэккэ, ыараханы кыайар, өссө эбиитин биирдэ эрэ төхтөрүйэн буолбакка, 8 эргииргэ тиийэ оҥороллор. Саха ыччата спорду талар, чөл олоххо сүгүрүйэр.