Дьокуускайга саха маанылаах таҥаһын түһүлгэтэ арылынна

Сунтаар улууһуттан төрүттээх, ураты талааннаах Варвара Егорова  - Дыгыйа  кыра эрдэҕиттэн ийэтиттэн, эдьиийдэриттэн уһуйуллан иис-уус эйгэтигэр киирэн, утумнаахтык дьарыктанан саҕалаабыта. Иистэнньэҥ  үлэлэрин мунньан саха мааны таҥаһын түһүлгэтин тэрийдэ.  Сахалыы таҥас күннээҕи олоххо киирэрин туһугар санаабын ууран туран үлэлиибин диэн Варвара Егорова этэр.

"Көрөҕүн дии, киһи хайдах танныбытын, кинини хайдах таҥыннарыаххын баҕараргын. Оннооҕор санаалар киирээччилэр – наһаа кыраһыабай киһи, кинини симээбит киһи диэн. Инники былааным, Ноев кинигэтинэн күн ахсын кэтэр таҥастары оҥорон пропагандалыахпын баҕарабын. Ол иһин бу тикпит  таҥастарбын сайын бэйэм кэтэн тахсааччыбын. Дьүөгэлэрбин ыҥыран этии  киллэрбиппин сөбүлээбиттэрэ", - диир Дыгыйа - иис маастара Варвара Егорова.

Тэрээһиҥҥэ иистэнньэҥ мааны уонна ис киирбэх таҥастарын, көстүүмнэрин аныгы кэмҥэ араастык кэтэллэрин дьон сэргэ сэҥээрэн көрдө.  Тэрээһини  саха таҥаһын саргытын салайсар, маастар дьүөгэтэ Светлана Петрова ыытта.

"Дьоҥҥо көрдөрүөн баҕарарын иһин, эмискэ тэрийдибит. Дьон кини таҥаһын олус интириэһиргиир.  Өрөспүүбүлүкэтээҕи куонкурстарга, күрэхтэргэ сахалыы, аныгылыы, мааны таҥастарга хас даҕаны  бастакы бириистээх. Кини үчүгэйэ диэн, матырыйаалга сыанатын кэрэйбэт. Куруутун биир буолбатын туһугар уларытан-тэлэритэн, ханнык эмит былыргы элеменнэртэн киллэрэн интириэһинэй таҥастары оҥорор. Ол иһин дьоҥҥо-сэргэҕэ көрдөрөөрү оҥордубут", - диэн историческай наука кандидата, тыл уонна култуура институтун фольклор уонна култуура кафедратын доцена  Светлана Петрова иһитиннэрдэ.

Илиитигэр талааннаах, айар куттаах Варвара Егорова - Дыгыйа иистэнэрин таһынан, хаартысканан утумнаахтык дьарыктанар. Бу күн хаартысканан дьүһүйүү быыстапката көрдөрүүгэ туруорулунна. Талааннаах киһи ураты буочара үлэлэригэр тута көстөр.

Маастар сатабыла, кини кыайыыта диэн санаанан салайтаран тэрээһин үрдүк таһымнаахтык ааста. Бу күн кэлбит дьон бары сахалыы таҥнан, киэргэлинэн симэнэн кэлбиттэр. Ордук сиэдэрэй таҥастаах ыалдьыттар маастартан бириис туттулар.