Саха сиригэр улуустарга куурусса, сибиинньэ тарҕатыыта салҕанар

Быйыл былаан быһыытынан 7 Арктика оройуонугар 5 тыһ. кэриҥэ куурусса, 245 сибиинньэ уонна 3219 туонна комбикорма тиэрдиллиэхтээх. Манна анаан 20 млн. үп көрүлүннэ. Түргэн ситэр салааны сайыннарыыга сыллата улахан болҕомто ууруллар. Улуустар тиэрдиллэр кууруссаны, сибиинньэни "Дьокуускайдааҕы көтөр фабриката", "Сайсары", "Саҥа" сопхуос, "Хатастааҕы сибиинньэ комплекса" уонна "Сибирь" хаһаайыстыба хааччыйаллар.      

"Бэлиэтиэххэ наада, былырыыҥҥыны кытта тэҥнээтэххэ, быйыл быһыы-майгы кыратык уларыйда. Улуустарга мээнэ өлөрөн баран сиэбэттэр, кэнники иитэр буолбуттар. Билэргит курдук, Бүлүүгэ, Сунтаарга, Аммаҕа саҥа көтөр фабрикалара быйыл арылыннылар. Итиэннэ хаһыс да сылын Орто Халыматааҕы фабрика үлэлии турар. Сөмөлүөтүнэн соторутааҕыта  Абыйга уонна Орто Халымаҕа улахан баартыйа барбыта. Атын да улуустар тэринэ сылдьаллар. Сорох улуустар суол арылларын күүтэллэр, онтон сорохтор авиацияны кэпсэтэ сылдьаллар", - диир  СӨ ТХМ кыылга-сүөлгэ, племенной үлэҕэ департаменын салайааччыта Николай Питимко.

Манна даҕатан эттэххэ, тустаах министиэристибэ хоту улуустарга сөмүлүөтүнэн кууруссаны, сибиинньэни тиэрдиини  100% уйунар. Оттон ааспыт сылы кытта тэҥнээтэххэ, быйыл түргэн ситэр салааны сайыннарар хоту улуус ахсаана элбээтэ, итиэннэ үбүлээһинэ үрдээтэ. Ол курдук, былырыын 4 улуус ылбыт эбит буоллаҕына, быйыл 7 улууска тиэрдиэхтэрэ.