Росгвардия салалтата Улуу Кыайыы күнүнэн бэтэрээннэрин эҕэрдэлиир

Бүгүҥҥү күҥҥэ Росгвардия Саха сиринээҕи салалтатын иһинэн 7 бэтэрээн баар. Олортон биирдэстэринэн 94 саастаах үлэ, тыыл, Россия ис дьыалаҕа министиэристибэтин бочуоттаах бэтэрээнэ Егор Пудович Афанасьев буолар.

Ыам ыйын 6 күнүгэр 94 сааһын томточчу туолан, 95 үктэммит, тыыл, ис дьыала министиэристибэтин бэтэрээнэ Егор Афанасьев Росгвардия Саха сиринээҕи салалататын сотрудниктарын көрсөр. Ытык кырдьаҕаһы маннык сыллата Улуу Кыайыы күнүн көрсө болҕомто ууран эҕэрдэлииллэр, махтал суругу, өйдөбүнньүк бэлэҕи туттараллар.

Сунтаар  улууһун Түбэй-Дьаархаан нэһилиэгиттэн  төрүттээх Егор Пудович үйэтин тухары ис дьыала уорганнарыгар сулууспалаабыта. Аҕа дойду сэриитэ саҕаланарыгар кини 12 уолчаан этэ. Ол кэмҥэ кини бииргэ төрөөбүт сэттиэ буолан, тулаайах хаалан кырдьаҕас эһэлэригэр иитиллибиттэрэ. 77 саастаах эһэлэрэ бултаан-алтаан, балыктаан 8 сиэнин барыларын атахтарыгар туруоран киһи-хара гыммыта.

"Бэһис кылааһы бүтэрэн тахсааппын кытта сэрии саҕаламмыта. Ол үөрэнэ сылдьан, эһээбит кырдьан, мин 8 кылаастан тохтооммун, колхозка үлэлээн сылдьыбытым", - диир үлэ, тыыл, РФ ИДьМ бочуоттаах бэтэрээнэ Егор Афанасьев.

Салгыы Егор Пудович 1952 сыллаахха армияҕа ыҥырыллан, Тихоокеанскай байыаннай муора флотугар бүтүн 4 сыл устата ситиһиилэхтик сулууспалаабыта. Армияттан кэлэн баран Ньурба улууһугар ис дьыала министиэристибэтин уорганнарыгар сулууспатын салҕаабыта. Егор Пудович бухгалтерияҕа, паспорт остуолун начальнигынан, ОБХСС оперболомуочунайынан, тас тэрилтэлэри харабыллыыр отдел салайааччытынан ситиһиилээхтик үлэлээбитэ.   

"Кистэлэҥ үбү-харчыны, аһы-үөлү сиэһиннэри утары охсуһан, мин син элбэх холуобунай дьыаланы арыйан, куһаҕана суохтук үлэлээбитим. Ис дьыала министиэристибэтин үлэһиттэригэр үчүгэй үлэни, норуот хаһаайыстыбыннай эбийиэктэрин үчүгэйдик харыстаан харабыллыылларыгар. Уонна уопсастыбыннай бэрээдэги, сокуону бөҕөргөтөллөрүгэр баҕарыам этэ", - диэн этэр Егор Афанасьев.

Кэргэнэ, биир дойдулааҕа, үөлээннээҕэ Агафья Никифоровна Михалевалыын үйэлэрин тухары бииргэ олорон 4 оҕону улаатыннаран, билигин сиэннэрин, хос сиэннэрин тапталларыгар угуттанан бочуоттаах сынньалаҥнарыгар олороллор. Агафья Никифоровна биһиги кэлэрбитигэр балыыһаҕа сытар буолан суох этэ. Егор Пудович уруһуйдуурун туохтааҕар да сөбүлүүр, хартыыналара дьиэтин киэргэтэн тураллар. Билигин хараҕым мөлтөөн уруһуйдуурбун тохтоппутум диэн кэпсиир.

Росгвардия Саха сиринээҕи Салалтата судаарыстыбыннай уонна чааһынай бас билиини, маны тэҥэ общественнэй бэрээдэги уонна куттала суох буолууну хааччыйар биир сүрүн сулууспа буолар. Бүгүҥҥү күҥҥэ салалта 1 сэрии уонна 6 тыыл бэтэрээннээх.

Ким да умнуллубат, туохха да умнуллубат, Улуу Кыайыыны уһансыбыт бэтэрээннэрбитигэр үйэлээх махтал симэлийбэтин.