Үүнэр көлүөнэ тыйаатыра “Зоя” моно испэктээги көрдөрүө

Аҕа дойду сэриитин кэмигэр бэйэтин хорсун быһыытынан элбэх киһиэхэ холобур буолбут Зоя Космодемьянская туһунан моно испэктээги Үүнэр көлүөнэ тыйаатыра бэлэмниир. Туруоруу Кыайыы күнүн өрөгөйдүү бу ый 5 күнүгэр буолуоҕа.

Үйэлэри уҥуордуур Зоя Космодемьянская туһунан үтүө өйдөбүл күн бүгүҥҥэ диэри дьон сүрэҕэр баар. Уоттаах сэрии кэмигэр тыһыынчанан өстөөх тыынын, тиэхиньикэтин суох гыммыт эдэр кыыс хорсун быһыытын төһөлөөх элбэх суруйааччы айымньытыгар, худуоһунньук хартыынатыгар хоһуйбутай? Ол курдук Маргарита Агилер поэмата үгүс дьон кутун туппута. Моно испэктээккэ сүрүн ааптар оруолун Антон Ботаков оонньоон көрдөрүө, ол туһунан режиссер Валентина Якимец иһитиннэрдэ.

Валентина Якимец, Үүнэр көлүөнэ тыйаатырын режиссера: "Антон поэзияны олус диэн сөбүлүүр. Бу иннинэ биһиги кинилиин “Хаарыан хампа” бэстибээлгэ Есенины кытары ааҕа сылдьыбыппыт. Онно маннык хабааннаах испэктээккэ оонньуур баҕатын биллэрбитэ. Онно Улуу Кыйаыыга аналлаах туруоруута бэлэмниэххэ диэн боулбутугар бу поэманы Антон бэйэтэ булан аҕалбыта".

Бу испэктээк 2020 сыллаахха бастакытын сүрэхтэммитэ. Үс сыл тухары, элбэх көрөөччү биһирэбилин ылан, сыанаттан түспэккэ оонньонор. Сүрүн дьоруой бэйэтин чуор куолаһынан көрөөччүнү ол дьыллар дуорааннарыгар баар оҥорорго дылы. Киһи истэ олорон уйадыйан, испэктээкили буолбакка илэ туораттан кэтээн турар киһи оруолугар киирэр.

Антон Ботаков, Үүнэр көлүөнэ тыйаатырын артыыһа: "Билиҥҥи ыччаттар Зоя Космодемьянская диэн кимин билбэттэр. Билиҥҥи оскуола барагырааматыгар суох эбит. Онон биһиги туруоруубут ыччаты үөрэтэр, сырдатар соруктаах".

Дьокуускай куорат араас оскуолалара оҕоҕо дойдунааттыы санааны иитэр туһуттан эрдэттэн сайаапка түһэрэллэр. Кырдьык, үүнэр көлүөнэ ыччат маннык тэрээһиннэргэ сырыттаҕына, Ийэ дойду дьоруойдарын хорсун быһыыларын үтүө холобур оҥостуохтара, кинилэринэн киэн туттуохтара диэн бэлиэтииллэр. "Зоя" испэктээк туруоруллуоҕуттан үгүс театральнай күрэхтэр кыайыылаахтара буолбута. Сөпкө талыллыбыт айымньы, режиссер уонна артыыс кыһамньыта - бу үлэ үтүө түмүгэ буолар.

Елизавета Далбараева, Үүнэр көлүөнэ тыйаатырын артыыһа: "Бу моно испэктээк. Манна мин көрөөччүгэ өйдөнүмтүө буоллун диэн Зоя уобараһын күлүгүнэн оонньоон көрдөрөбүн. Дьоруойдарбытын Кыайыы күнүгэр эрэ буолбакка куруук саныы сылдьыахха дии саныыбын".

Баара суоҕа 18 эрэ саастаах кыыс уоттаах сэрии кэмигэр эр санаатын ыһыктыбатах, куттанан толлон турбатах, хорсун быһыылаахтык кырдьык, кыайыы иһин охтубута. Маны артыыстар бэрт итэҕэтиилээхтик сыанаҕа күлүк нөҥүө режиссер ураты көрүүтүнэн оонньууллар.