Горнайга кымыс бэстибээлэ ыытыллыа

Быйыл Горнай Бэрдьигэстээҕэр ыһыах уратылаах буолуоҕа. Ыһыаҕы тэҥэ  кымыс бэстибээлэ тэриллиэҕэ. Ураты тэрээһин  бырайыагын  нэһилиэк ыччата көҕүлээтэ. Билигин   бэлэмнэнии үлэтэ номнуо саҕаланна. Бу күннэргэ олохтоохторго анаан чороон оҥоруутугар норуот маастара үөрэҕи ыытта.

Ааспыт сылга Бэрдьигэстээх түөлбэлэрин ыччатын ортотугар ыытыллыбыт дьыалабыай оонньууга "Үрдэл" түөлбэ хамаандата "Кымыс бэстибээлэ” барыйыагынан кыайыылаах тахсыбыта. Онтон салгыы бу бырайыагы олохтоох дьаһалта уонна ыччат агентствотын исписэлиистэрэ ситэрэн-хоторон, тупсаран  Президент фондатын граныгар ыыппыттара кыайыылаах тахсан 316 тыһ. солк. үпкэ тиксибитэ. Онон билигин  бэс ыйыгар нэһилиэк ыһыаҕын кытары холбуу кымыс бэстибээлин ыытыы соруга турар. Тэрээһиҥҥэ бэлэмнэнии иитинэн бу күннэргэ норуот маастара Андрей Малышев чороон оҥоруутугар олохтоох дьону үөрэтэр.

Ксения Васильева, Бэрдьигэстээх нэһилиэгин баһылыгын солбуйааччы: "Манна Андрей Лукич доҕотторун, бииргэ үлэлэһэр дьоннорун Василий Протопоповы уонна  кини үөрэнээччилэрин  илдьэ кэлбитэ. Онон сыалай үс көлүөнэ уус биир күн устата маастар кылаас биэрбиттэрэ. Онтон баҕалаах дьон элбэҕин иһин маастардар салгыы үөрэтэр баҕаларын биллэрэн, бу билигин станокка чороон оҥоруутун үөрэтэллэр. "

Иккис  төгүллээн ыытыллыбыт чороон оҥоруутун маастар кылааһыгар араас идэлээх дьон сылдьан сатабылларга үөрэннэ. Ордук иискэ-ууска чугас дьон маннык тэрээһини мүлчү туппатылар. Маһынан уһаныы эр дьон дьарыга диэн өйдөбүлү туора сотон, кэрэ анардар чороон оҥоруутун үөрэҕин ылына кэлбиттэрэ кэрэхсэттэ.

Сайдыына Нарыйаана-Уус кыыһа,  уус: "Маһы мин кыра оҕо эрдэхпиттэн олус сэҥээрэбин. Ол иһин кыралаан уһанабын. Ааспыт сырыыга оһуор оҥоруутугар сылдьыбытым, онтон билигин станокка үлэлииргэ үөрэнэ кэллим. Бэйэм эрдэ иистэнэр этим, онтон билигин атын хайысханы баһылыахпын баҕаран бу чороон оҥоруутугар кэллим".  

Күн устата барбыт сатабыл үөрэҕэр чороон оҥорууга хатыҥ дьыл ханнык кэмигэр, хайдах быһыылаахтык хатарыллыахтааҕыттан саҕалаан,  чочуйуутугар уонна оһуорун-мандарын кырааскатын түһэриигэ тиийэ маастардар ымпыктаан-чымпыктаан үөрэттилэр.

Андрей Малышев, норуот маастара: "Быйыл иһэ, таһа илиинэн хаһыы чорооннору аҕалтаатым. Станокка хаһыыга өр сылларга үлэлэспит буолан, быһыытын-таһаатын дьэ биллим диэммин илиинэн хаһарга быйыл санаммытым. Онтум икки улахан иһит буолан таҕыста. Чорооммут быһыытыттан омукпут култууратын таһыма көстөр".

Быйылгы Бэрдьигэстээх ыһыаҕа чыҥха уратылаах буолара күүтүллэр, ол курдук хас биирдии ыһыахтыыр киһи  бэйэтэ чороонноох кэлэн, сахалыы үгэһи, сиэри-туому тутуһан оҥоһуллубут, алгыс иҥпит кымыһын чороонугар толору куттан иһиэҕэ. Маныаха, Бэрдьигэстээх дьонугар уйгуну-быйаҥы бэлиэтиир үрүҥ илгэ иһитэ, чороон хас ыал ахсын баар буоларын ситиһиэхтээхпит.