Өрөспүүлүкэбит күнүн көрсө бу күннэргэ элбэх тэрээһин буолан ааста

Барыбытыбар долгутуулаах, улахан суолтаны ылар Улуу күммүт. Гимназия үөрэнээччилэрэ алын кылаастан улахан сүһүөххэ тиийэ бары бүгүҥҥү күн дириҥ ис хоһооннооҕун умнубаттар. Бу нэдиэлэ устата сахабыт тылын, төрүт үгэстэрин үйэтитиигэ уонна араас тас дойдуларга Саха сирин уонна сахалар туһунан тарҕатыыга тэрээһиннэр ыытыллаллар.

Биир бэлиэ тэрээһиннэринэн "Өрөгөй түһүлгэтэ" буолар. Манна үөрэх дьылын устата өрөспүүбүлүкэ уонна Дойду таһымнаах олимпиадаларга, научнай конференцияларга улахан ситиһиилээх оҕолор чиэстэнэллэр. Маннык тэрээһин ыытыллара оҕоҕо ситиһиилээх инникитигэр улахан хардыы буолар.

"Биһиги гимназиябытыгар Өрөспүүбүлүкэ күнүгэр анаан, сылын аайы араас тэрээһиннэр ыытыллаллаар. Билигин онно аналлаах декадабыт буола турар. Ол иитинэн, кылаас чаастара, дьону кытта көрсүһүү, телемост, оҕолор аһаҕас кэпсэтиилэрэ тэрилиннилэр", - диэн Дьокуускай куорат национальнай гимназиятын дириэктэрэ Валентина Пермякова кэпсээтэ.

Оҕону кыра сааһыттан сахалыы тыыннаах иитэр-үөрэтэр оскуолаҕа, хас бэнэдиэнньик күн ахсын, бары сахалыы таҥнан кэлэллэр. Уруоктара барыта сахалыы тылынан ыытыллар буолан, үөрэнээччилэр мэһэйэ суох ыраастык саҥараллар.

Национальнай гимназияттан 100 уол оҕо, былырыын өрөспүүбүлүкэ күнүн көрсө, Исидор Барахов паамытынньыгар хоһоон аахпыттарын ахтан ааһар оруннаах. Өрөспүүбүлүкэни дьон ааттатар. Ол курдук СӨ Духуобунаска Академиятын бэрэсэдьиэнэ, биллиилээх худуоһунньук - Афанасий Осипов хартыыналарын "Өрөспүүбүлүкэ ааттара" быыстапката арылынна. Кини бэйэтин үлэлэригэр "Худуоһунньук уонна олох", "Худуоһунньук уонна бириэмэ" диэн сүрүн ирдэбили тутуһан дьон мэтириэтин үрдүк маастарыстыбалаахтык хоһуйбута.

"Академик Афанасий Осипов аатынан хартыына галереяҕа саҥа быыстапка арылынна. 26 чыыһылаттан ыам ыйын 7 күнүгэр диэри кэлэн көрөн-сэргээн барыаххытын сөп. Быыстапкаҕа худуоһунньук тэҥҥэ алтыспыт, үлэлэспит доҕотторун, дьонун-сэргэтин мэтириэттэрэ турдулар", - диэн академик Афанасий Осипов аатынан хартыына галереятын сэбиэдиссэйэ Наталья Христофорова эттэ.

Норуот үрдүк биһирэбилин ылбыт худуоһунньук бэйэтин айымньыларыгар дойдуларыгар үрдүк бэриниилээх, киэн туттар дьоммутун үйэтиппитэ. Үйэ тухары сууруллубат, сүппэт сүҥкэн улуу кылаата хас эмэ үйэни уҥуордуо диэн эрэнэбит.

""Өрөспүүбүлүкэ ааттара" диэн быыстапкаҕа 13 үлэ турда. Саха Өрөспүүбүлүкэтигэр улахан кылааты киллэрбит чулуу дьоннорбут мэтириэттэрэ бааллар", - диир академик Афанасий Осипов аатынан хартыына галереятын экскурсовода Екатерина Иванова.

Бэйэтин олоҕун, айар үлэтин төрөөбүт дойдутугар, дьонугар-сэргэтигэр анаабыт худуоһунньук улахан холобур буолар.