Горнайдар араас хайысхалаах бырайыактарга, граннарга көхтөөхтүк кытталлар

Ил Дархан Айсен Николаев Горнай улууьугар үлэтин кэмигэр олохтоохтору, уопсастыбаннай хамсааһын кыттыылаахтарын кытта көрүстэ. Көрсүһүүгэ федеральнай уонна региональнай граннар куонкурстарын кыайыылаахтара үлэлэрин түмүгүн, итиэннэ саҥа бырайыактарын билиһиннэрдилэр.

Горнай улууһун олохтоохторо, уопсастыбаннай хамсааһын кыттыылаахтара куруук араас хайысхалаах бырайыактарга, граннарга көхтөөхтүк кытталлар. Аҥардас бу сылга Бэрдьигэстээх нэһилиэгэ  Ил Дархан граныгар кыттан 6 бырайыага кыайыылаах тахсыбыт.  Итиэннэ култуура пуондатыттан эмиэ биир бырайыагы ылары ситиспитэ. Уопсайа бу сыл саҕаланыыта нэһилиэк барыта 19 млн. сууммалаах граны кыайбыт.

"Тоһоҕолоон эттэххэ, аҕам саастаахтары өйүүргэ, ыччат политикатын тематыгар, айылҕа харыстабыла, маннык араас хас даҕаны хайысхаҕа бырайыактары суруйаллар. Оттон биһиги актыбыыс дьоммут, уопсастыбынньыктарбыт бэйэлэрин баҕаларын, идиэйэлэрин бырайыактааннар олоххо киллэрэллэр. Бу грантовай политика сайда турарыгар үөрэбит. Тустаах көмөлөр өссө да баар буоллуннар диэн баҕа санаалаахпыт", - диир Бэрдьигэстээх нэһилиэгин баһылыгын солбуйааччыта Ксения Васильева.

Василий Кривошапкин былырыын бэйэтин бырайыагынан "Муус устар" ыччат бэстибээлигэр спорт хайысхатыгар кыттан кыайыылаах тахсыбыта. Бырайыак сүрүн соруга национальнай спорт көрүҥнэрин сайыннарыы, ыччаты спорт эйгэтигэр сыһыарыы буолар.

"Саха сиригэр, Россияҕа даҕаны суох. Ол иһин экспертэр улахан болҕомтону онно уурбуттара. Биһиэхэ Саха сиригэр Амитан диэн спортивнай тренажердары оҥорор тэрилтэни кытта үлэлэһэммит, чопчу национальнай көрүҥүнэн дьарыктанарга сайыҥҥы былаһаакка оҥоруохтаахпыт", - диэн Одуну нэһилиэгин баһылыгын солбуйааччыта  Василий Кривошапкин кэпсээтэ.

Семён Семёнов улууска тайаҕы иитэр ферма тэрийэр былааннаах. Кини  Горнайга экотуризм хйысхатын сайыннарар санаалаах. Тайаҕы иитэн, тыа кыылын кытары дьону алтыһыннаран, иппотерапия холобурунан эмтэнии, доруобуйаны чөлүгэр түһэрии бырайыагын суруйан олоххо киллэрэр былааннаах.  

"Тайаҕы иитэр ферманы Ил Дархан Айсен Николаев сэҥээрдэ, бу Саха сиригэр баар буолара наадалаах диэн. Кини бу бырайыак регионнааҕы эрэ буолбакка, Россия таһымнаах буолуон сөп диэн", - диир Горнай улууһун олимпийскай эрэллэри бэлэмниир спортивнай оскуола методист инструктара Семён Семёнов.

Горнай улууһа гран ылыытыгар Өрөспүүбүлүкэ үрдүнэн бастакы миэстэҕэ турар, онон холобур буолар. Аҥардас  3 сыл иһигэр федеральнай уонна өрөспүүбүлүкэтээҕи граннарга, куонкурстарга кыттан, уопсайа 32 мөлүйүөннээх суумманы кыайан, 71 бырайыагы олоххо киллэрбит. 

"Ыччат министиэристибэтэ Горнай улууһуттан үөрэнэбит. Бэйэбит эмиэ ресурснай киин курдук, муниципальнай оройуоннаҕы киин оҥорон үлэлээн эрэбит. Бу улуустары барыларын тэҥҥэ хамсатар, үлэлэтэр  курдук. Улуус  уопсастыбынньыктарын уонна ресурснай кииннэрин кытта биир сыал туруорунарга. Сүрүн сыалбыт федеральнай граннарга кыайыы уонна харчыны өрөспүүбүлүкэҕэ аҕалыы. Биллэн турар, быйыл култуураҕа, спортка, ыччат политикатыгар, патриотическай иитиигэ уонна дьиэ кэргэн иитиитигэр элбэх гран кэллэ", - диэн СӨ ыччат дьыалаларыгар уонна социальнай коммуникацияҕа миниистирэ Пётр Шамаев иһитиннэрдэ.

Быйыл Ил Дархан граныгар Өрөспүүбүлүкэ араас муннугуттан барыта 400 тахса сайаапка киирбит. Ханнык да сыллааҕар элбэх сайаапка киирдэ диэн тустаах исписиэлиистэр бэлиэтииллэр. Маны таһынан,  федеральнай граҥҥа 100 тахса сайаапка ыыппыттар. Онон саҥа бырайыактары олоххо киллэрии, куорат, улуус тупсарыгар хас биирдии киһи кыһаллар.