Чурапчы - Аллараа Бэстээх хайысханнан саҥа автобус сырыыта олохтонно

Өрөспүүбүлүкэ күнүн көрсө, Чурапчы - Аллараа Бэстээх хайысханнан, саҥа автобус сырыыта олохтонно. Аны мантан ыла нэһилиэнньэ ыарахан сыанаҕа таксиннан эрэ буолбакка, автобуһунан удамыр сыанаҕа айанныыр кыахтанна.

Чурапчы-Аллараа Бэстээх хайысханнан саҥа автобус сырыыта олохтонон, номнуо бастакы сырыыларын оҥордо. Бастакы автобуһу Аллараа Бэстээххэ үөрүүлээх быһыыга-майгыга көрүстүлэр.

Аан маҥнайгы пассажирдар саҥа автобус сымнаҕас айанын, сылаас олбоҕун, тупсаҕай оҥоһуулаах аныгы тимир көлөнү хайгыы көрдүлэр. Биир автобуска 32 буолан  айанныахха сөп. Аны мантан ыла автобуһунан эрэ сылдьыам диэччилэр кытары бааллар.

Чурапчы уонна Мэҥэ Хаҥалас улууһун дьоно-сэргэтэ үөрүүлэрэ муҥура суох. Сэбиэскэй сойуус саҕана сүүрэ сылдьыбыт автобус сырыыта сөргүтүллэн аны мантан ыла хара сарсыардаттан саҕалаан, хойут киэһэҕэ диэри биир күн устата 3 сырыыны оҥоруоҕа. Мэҥэ хаҥалас улууһун 3 нэһилиэгин, ол курдук Тумул, Төҥүлү, Нуораҕана уонна Чурапчы улууһун Маралаайы бөһүөлэктэрин таарыйар буолан ити нэһилиэктэр олохтоохторугар туспа тарыып олохтоммут.

"Бу биһиги нэһилиэктэрбитигэр күүс-көмө буолар, киирэллэригэр-тахсалларыгар. Олох үчүгэй, табыгастаах маршрут саҕаланна. Син биир сайдыы баран иһэр, Мэҥэ Хаҥалас транспортнай кииҥҥэ олорор, тимир суола баар. Сүүрүү-көтүү элбэх", - диир Мэҥэ Хаҥалас улууһун баһылыгын бастакы солбуйааччы Василий Михайлов.

Өскөтүн, Чурапчыттан Аллараа Бэстээххэ диэри таксиннан кэлэр эбит буоллаххына, биир киһи 1200 солкуобайы төлүүргэ күһэллэр. Онон автобуска 412 солкуобайы төлүүр  таксис сыанатыттан  3 төгүл чэпчэки, онон айанньытарга табыгастаах.

"Сайыҥҥы бириэмэҕэ син биир Аллараа Бэстээххэ кэлэбит. Бу уопсай экономикаҕа даҕаны, дьон өйдөбүлүгэр даҕаны сыана оонньооһунугар улахан кыаҕы биэриэҕэ диэн. Уонна автобус тупсаҕай, суолбут тупсан сырыы сыыдам буолла. Ханнык баҕарар такситааҕар түргэнник кэлэр кыахтанна", - диэн Чурапчы улууһун баһылыга Степан Саргыдаев этэр.

Икки улуус историятыгар киирбит бэлиэ түгэни Өрөспүүбүлүкэбит күнүгэр анаатылар. Мантан ыла олохтоохтор түргэн, сыыдам сырыылаах аныгы автобуһунан, Чурапчыга диэри саҥа тэлгэммит асфальт суолунан сылдьар кыахтаннылар.

"Биһиги дьоммутугар, олохтоохторбутугар көмө, өҥө буолла. Онон биһиги бу суолу саҕалаабыппытын өссө тупсара туруохпут. Быйыл Чурапчы нэһилиэгэ 375 сылын туолар. Бу онно кыракый сэмэй бэлэх буолла дии саныыбын ", - диэн СӨ бырабыытылыстыбатын бэрэссэдээтэлин бастакы солбуйааччы  Дмитрий Садовников иһитиннэрдэ.

Бырабыытылыстыба өссө даҕаны маннык улуустар икки ардыларынааҕы автобус сырыытын элбэтэр санаалаах, аны сайын өссө 25 автобуһу атыылаһан саҥа маршруттары арыйар былааннаахтар.