Ыам ыйын 1 күнүттэн оҕо сынньалаҥ лаҕырдарыгар суруйтарыы саҕаланар

Саха сирин үрдүнэн ыам ыйын 1 күнүттэн сайыҥҥы оҕо сынньалаҥ лаҕырдарыгар суруйтарыы саҕаланар. Быйылгыттан лааҕырга суруйтарыы саҥа көрүҥүнэн - Госуслуги портал нөҥүө оҥоһуллар, ону тэҥэ үөрэх тэрилтэтигэр бэйэтигэр тиийэн эмиэ докумуоннары туттарыахха сөп. Оҕолор өрөспүүбүлүкэ иһигэр эрэ буолбакка, тустаах федеральнай программаларынан бөдөҥ оҕо сынньалаҥ кииннэригэр, лааҕырдарыгар сынньанар кыахтаахтар.

Киин куоракка сайыҥҥы оҕо лааҕырдарыгар алта аҥарыттан 17 диэри саастаах Дьокуускайга олорор оҕолор сылдьар кыахтаахтар. Быйыл сайын куорат үрдүнэн этиллибитин курдук, 49 муниципальнай лааҕыр аанын тэлэччи аһыаҕа. Бэлиэтээн эттэххэ, ааспыт сылга Дьокуускайга 45 оҕо лааҕыра үлэлээбитэ, онон бу сырыыга 4 лааҕыр эбиллэн биэрдэ. Ол курдук, үөрэх базатыгар 40 күнүскү, 5 куорат таһынааҕы хонуктаах лааҕырдар, 2 үлэ уонна сынньалаҥ, итиэнэ 2 балаакканан хоно сытар лааҕырдар оҕо сынньалаҥын, дьарыктаах буолуутун хааччыйыахтара.

Оҕолору сайыҥҥы лааҕырга суруйтарарга төрөппүт, биитэр сокуоннай бэрэстэбиитэл сайабылыанньата, паспорын копията, оҕо төрөөбүтүн туһунан туоһу сурук, оҕо 14 саастаах буоллаҕына паспорын копията, оҕо сынньалаҥар уонна чэбдигирдиитигэр оҥоһуллар өҥө дуогабара, оҕо доробуйатын туһунан  ыспыраапка, оһол-дэҥ түбэлэтэтиттэн страховка эмиэ ирдэнэр. Госуслуги порталга Дети.Образование диэн разделы баттыыгын, региональные услуги диэҥҥэ испииһэктэн Организация отдыха детей в каникулярное время диэҥҥэ киирэн барытын толорон иһэҕин. Оҕолор өрөспүүбүлүкэ иһигэр эрэ буолбакка, тустаах федеральнай программаларынан бөдөҥ оҕо сынньалаҥ кииннэригэр, лааҕырдарыгар сынньанар кыахтаахтар.

“Өрөспүүбүлүкэ таһынааҕы лааҕырдарга ыытаары сылдьабыт. 292 хоту улуустарын оҕолоро федеральнай “Дети Арктики” программанан икки сезонунан босхо сынньаныахтара. 566 о5о үөрэхтээһин сайдыытын судаарыстыбыннай программатынан барар, путевката босхо, айан төлөбүрэ сороҕо босхо, сороҕо төрөппүт төлөбүрдээх. Чэпчэтиилээх билиэттээх буолар. Ол таһынан, буоларын курдук, 484 путевкаҕа федеральнай кииннэргэ, “Океан”, “Орленок”, “Смена” уонна “Артек” лааҕырдарга сөбүлэҥ оҥоһулунна”, - диэн СӨ үөрэҕириигэ министиэристибэтин уопсай уонна эбии үөрэхтээһиҥҥэ,иитиигэ департаменын кылаабынай исписэлииһэ Диана Сергеева иһитиннэрдэ.

Маны тэҥэ, анал байыаннай кыттыылаахтарын оҕолоругар өрөспүүбүлүкэ ханнык баҕарар лааҕырдарыгар босхо путевка бэриллэр. Бүгүҥҥү күҥҥэ,  балтараа тыһыынча кэриҥэ оҕоҕо путевка бэриллэрин туһунан быһаарыы ылыллан турар. Оҕо сынньалаҥын тэрийии сыллата тустаах болҕомтону ылар. Онон быйыл даҕаны уонунан тыһынча оҕо сынньалаҥын туһалаахтык атаарыа турдҕа. Лааҕырдар үлэлэрэ номнуо бэс ыйын саҥатыттан саҕаланан, сезоннарынан ыытыллыаҕа.