"ЭнТик: стратегия в практике" бырайыак

Бу күннэргэ "Россия - мин историям" түмэлгэ Дойду үрдүнэн ыытыллар "ЭнТик: стратегия в практике" бырайыак ыытылынна. Ол чэрчитинэн дьылабыай программа уонна этнокультура эйгэтин лидердэрин тургутуга саҕаланна. Арассыыйа араас муннуктарыттан 70 кэриҥэ киһи муһунна.

Бу бырайыак номнуо ахсыс куоратыгар ыытыллар, оттон Саха сиригэр 6 сырыыта буолла. Норуоттар икки ардыларыгар или-эйэни бөҕөргөтөр уонна ону олоххо киллэрэн табыгастаахтык туһанар соруктаах тэрээһин буолар. Бүгүҥҥү үөрүүлээх арыллыыга "Этник: стратегия в практике" бырайыак салайааччыта, Арассыыйа норуоттарын култуураларын уонна тылларын сайдыытын хамыһыйа чилиэнэ, бэдэрээлнэй эксперт Евгения Михалева ыалдьыттаата.

Мустубут ыалдьыттарга Судаарыстыба национальнай политикатын туһунан экспертэр сырдаттылар. Хас да улахан тиэмэлэри хабан общественниктар, устудьуоннар аһаҕас микрофоҥҥа көхтөөх кыттыыны ыллылар.

"Биһиэхэ кэллилэр Иркутскайдааҕы российскай-немецскай дьиэ уонна буряттар общиналарын бэрэстэбиитэллэрэ. Бу тэрээһин ыччат инициативатын, баҕа санаатын олоххо киллэрэр сыаллаах үлэлиир, итиэннэ хайдах киллэрэргэ үөрэтэр. Манна практикаҕа тус бырайыактарын олоххо киллэрбит дьон  уопуттарын үллэстэллэр", - диэн Өксөкүлээх Өлөксөй аатынан норуоттар дорҕордоһууларын дьиэтин  сүрүннүүр исписэлииһэ  Анастасия Дарбасова иһитиннэрдэ.

Этнокультурнай салааҕа бастакытын  Арассыыйа араас регионнарынан уопут атастаһыыта буолла. Манна кэлбит ыалдьыттар этнокультурнай эйгэҕэ үлэлии-хамныы  сылдьар нэһилиэнньэҕэ бэйэлэрин уопуттарын уонна бырайыактарын кэпсээтилэр.

"ЭтНик" бырайыак Саха Өрөспүүбүлүкэтигэр ыытыллара сүҥкэн оруоллаах. Арассыыйа састаабар национальнай элбэх норуоттаах өрөспүүбүкэ буолан туран, маннык улахан тэрээһини ыытара ордук табыгастааҕынан ааҕыллар. Түөрүйэлии эрэ билиигэ олоҕурбакка, олоххо сытыытык киллэрэн уопут атастаһыы - бу ордук билиини чиҥэтэр.

"Бу тэрээһин иһигэр атын элбэх семинардар, стажировкалар, төгүрүк остуоллар бааллар. Чопчу, эйэлээхтик олорууга туһалаах тэрээһиннэри ыытыахпыт. Сүрүн сыала-соруга Россияҕа, Өрөспүүбүлүкэҕэ норуоттары биир ньыгыл курдук сыаналыырга диэн буолар" – диир СӨ тас сибээскэ миниистирэ Гаврил Кириллин.

Инникитин саҥа саҕахтары саҕар бырайыак, норуоттар икки ардыларыгар быстыспат үйэлээх ситими үөскэтиэ диэн кыттааччылар бэлиэтээтилэр.