Бүтүн Өрөспүүбүлүкэ үрдүнэн булт больдоҕо утуу-субуу саҕаланан эрэр

Билигин көҥүл биэриитэ тэтимнээхтик ыытыллар. Куска көҥүлү биэриини кытта, сорох дьон булт билиэтин оҥоттороллор. Киин куоракка 3 сиринэн булт көҥүлүн биэрэн саҕалаатылар.

Дьокуускай куораттан сылдьар Дмитрий Протопопов бултуу бараары дөкүөмүөн сүүрсүүтүн түбүгэр сылдьар. Хас сылын ахсын сааскы бултка тахсан Дьокуускай-Хаҥалас эргин мэнээк куһунан бултуур. Билигин туох баар көҥүлүн ылан, аны сотору кэминэн тыаҕа тахсар былааннаах.

Аан бастаан бултуу барыах иннинэ ирдэнэр докумуону барытын ылан, көҥүл бэриллибитин кэнниттэн бултка тахсар наада. Булчут билиэтин Айылҕа харыстабылын министиэристибэтиттэн ылыахха сөп. Тустаах докумуону ылыы быраабылата судургу, ол эрэн сотору кэминэн билиэти ылыыга эксээмэн киириэн сөп.

"Булт билиэтэ болдьоҕо суох. Туох да уларыйыы киирэ илик. Сокуон бырайыактара оҥоһуллубуттара, холобур, булгуччу эксээмэн туттаран булт билиэтин ылыахтаахтар диэн. Билигин булт ирдэбилин билистим диэн сайабылыанньаҕа бэлиэ туруорар, онон бүтэр, билиэти ылар», - диир Айылҕа харыстабылын министиэристибэтин булт хаһаайыстыбатын департаменын салайааччытын солбуйааччы Анатолий Попов.

Билиҥҥи туругунан 117 тыһыынча булчут билиэтэ бэриллэн турар, хас сылын ахсын ортотунан итинник билиэти 3,5 тыһыынча киһи ылар. Онтон сааскы аатыыр куска бултааһыҥҥа көҥүлү биэрии салҕанар. Биир киһиэхэ саамай элбээбитэ 30 куһу бултуурга көҥүл бэриллэр, онтон хоту улуустар олохтоохторо биирдии бэйэлэригэр саамай муҥутаабыта 50 куһу бултуохтарын сөп. Дьокуускай куоракка көҥүлү 3 сиртэн ылыахха сөп.

"Атын улуустарга инспекцияларбыт, комитеттарбыт миэстэтигэр биэрэллэр. Уонна куска көҥүл ылыан баҕалаахтар 650 солк. сууммалаах  судаарсытыбыннай нолуок төлүүллэр. Ити төлөммүтүн кэнниттэн, улуустарга комитетка тиийэн сайабылыанньа суруйан ылыахтарын сөп. Эбэтэр Госуслуга нөҥүө эмиэ сайаапка биэриэхтэрин сөп", - диэн Айылҕа харыстабылын министиэристибэтин булт хаһаайыстыбатын департаменын сүрүн исписэлииһэ Егор Дьяконов иһитиннэрдэ.

Булт кэмигэр араас хабааннаах рейдэлэр ыытыллыахтара, кыһыл кинигэҕэ киирбит кыыллары, эбэтэр сиэри таһынан бултаабыт дьону бултуур бырааптарын суут нөҥүө быһыахтарын сөп. Оччоҕуна кинилэргэ инникитин көҥүлү биэрии хааччахтанар.