Саха сиригэр сааскы халаан уутугар бэлэмнэнии салҕанар

31

Өлүөнэ өрүскэ Табаҕа бөһүөлэгин таһыгар билигин мууһуу хараарда уонна эрбэтэ сылдьаллар. Бу кэнниттэн кумаҕы уонна чох быылын куталлар, оччотугар күн уота ититтэҕинэ, чох муус уулларын түргэтэтэр, быдан чарааһыыр. Инникитин бу үлэ муус барыытын биллэрдик чэпчэтэр. Манна даҕатан эттэххэ, бу үлэни үбүлээһин сыллата улаатар. Быйыл ити сыалга 45 кэриҥэ мөлүйүөн үп көрүллүбүт. 

“Хараардааһын, эрбээһин үлэтэ күүскэ бара турар. Ол курдук, хараардааһын үлэтэ улахан аҥаара бүтэн турар. Мууһу эрбээһин түргэнник барар. Билиҥҥи туругунан, куорат территориятыгар эрэ хаалла муус эрбээһинэ. Бу үлэ хас сыл ахсын федеральнай бүддьүөттэн көмө кэлэн үлэ барар. Сүрүн өрүстэрбитигэр Өлүөнэҕэ, Халымаҕа 27 млн. курдук хаччыга биһиги филиалбыт Ленаводхоз үлэ ыытар. Оттон субвенция нөҥүө, айылҕа харыстабылын министиэристибэтэ Алдаҥҥа, Аммаҕа, Нүүйэҕэ, Токкоҕо 17 млн. курдук сууммаҕа үлэлиир. Онно бүгүҥҥү күҥҥэ, үлэ бүтэн турар”, - диир Уу саппааһын Федеральнай агенствотын Өлүөнэтээҕи уу салалтатын салайааччыта Пётр Аргунов.

Билигин халаан уутун содулун туоратыыга хараардааһын үлэтигэр былаан 60% туолла, оттон эрбээһиҥҥэ 90%. Үлэ Ленскэй, Өлүөхүмэ, Үөһээ Халыма оройуоннарын территорияларыгар түмүктэннэ. Орто Халыма оройуона түмүктүүр түһүмэххэ сылдьар. Бэлиэтээн эттэххэ, ордук элбэхтэ харыы тахсар сирдэргэ Ленскэй, Өлүөхүмэ, Хаҥалас, Мэҥэ Хаҥалас, Нам, Уус Алдан, Кэбээйи оройуоннара уонна Дьокуускай киирсэллэр.