Дьиэлэргэ чалбах уута киирэн, олохтоохтор ыарахаттары көрсөллөр

Быйыл Дьокуускайга хас да дьиэҕэ чалбах уута киирэн, олохтоохтор кэккэ ыарахаттары көрсөллөр. Олортон биирдэстэрэ Автодорожнай уулусса 3/3 нүөмэрдээх дьиэтэ буолар. Олохтоохтор 2016 сыллаахтан кыһалҕаларын этинэллэр, сурук суруйаллар да билиҥҥитэ  туох да быһаарылла илик.

Бу көстөр хаартыскаларга дьиэҕэ уу соһуччу киирэн, киһи тобугар диэри чалбах уута, маннык хартыына хас сылын ахсын хатыланар. Степановтар бу дьиэҕэ 5 буолан олороллор. Киин куоракка түспүт хаар кэмигэр ыраастаммакка, элбэх содулу аҕалла. Өскөтүн суолга-иискэ, дьон хаамар сирдэринэн уу килэччи көрөн сытара билигин кими да соһуппат буоллаҕына,  дьон олорор дьиэтэ чалбах уутугар барыыта быйыл хаһааҥҥытааҕар да элбээтэ.

"2013 сыллаахха ылбытым бу дьиэни, онно туруга үчүгэй курдук этэ. Эрдэ ууга барар эбит, биһиги ону билбэт этибит. 2015 сыллаахтан күһүн ууга баран саҕалаабыппыт, онтон 2016 сыллаахтан саас ириэрии буолла даҕаны куруутун ууга барабыт. Сэтинньи ыйга диэри маннык ууга олоробут. Ардах уутугар", - диир Автодорожнай уулусса 3/3 дьиэтин олохтооҕо Павлина Степанова кэпсээтэ.

Уокурук салалтата эппитинэн хомуллуохтаах хаар барыта хомуллубут, билигин чалбаҕы ыраастааһыҥҥа үлэ барар.  Ол эрэн , бу уокурукка балаһыанньа уустук соҕус.

Уопсайа бу дьиэҕэ 4 кыбартыыра баарыттан, 3  кыбартыыраҕа дьон олорор.  Дьиэни 2020 сыллаахха хаарбах туруктааҕынан билиммиттэрэ, ол эрэн хаһан көһөллөрө биллибэт. Билигин уочаракка 1025 тураллар. Онуоха диэри бу маннык усулуобуйаҕа олорорго күһэллэллэр.

Инники маневреннай дьиэҕэ хос биэрэ сылдьыбыттар, онно элбэх оҕолоох дьиэ кэргэн кыайан баппакка, төттөрү урукку дьиэлэригэр көһөн кэлбиттэр. Уокурук салалтата төттөрү иккистээн атын дьиэҕэ көһөрөр былааннаах. Оттон хаһаайыттар кыра дьиэҕэ көһөр былааннара суох.

Бу күннэргэ, манна аны анал хамыыһыйа кэлэн дьон олорор усулуобуйатын көрөн быһаарыы ылыныахтаахтар. Хаһаайыттар аны маневреннай дьиэҕэ көстөхпүтүнэ, хас сыл саҥа дьиэни күүтэрбит биллибэт диэн долгуйаллар. Онон көһөр санаалара суох.