Быйыл Өрөспүүбүлүкэ үрдүнэн 260 км тахса суолу өрөмүөннүөхтэрэ

Барыта 8 млрд. тахса үп көрүллүөҕэ, онтон 4 аҥаар млрд. тахсата федеральнай харчы. 2019 сылтан Саха сиригэр "Куттала суох хаачыстыбалаах массыына суоллара" национальнай бырайыак үлэлиир. Ол чэрчитинэн, кэккэ улууска уонна киин куоракка суоллар саҥардыллыахтара.

Дьокуускай киин суолугар - Ленин проспегар өрөмүөн быйыл 3 сылын ыытылла турар. Суол саҥатыгар ЛОРП-тан Хабарова уулусатыгар уонна бу проспект бүтүүтүгэр Кулаковскайтан Красноярова уулуссаҕа диэри учаастактары оҥоро сылдьаллар. Улахан техникэ сарсыардаттан киэһээҥҥи диэри быыстала суох тигиниир. Эргэ асфаалын төрдүттэн көтүрэн, улахан хааһыылар бара тураллар. Онтон хаһыллыбыт сири дэхсилээн, аннын бэлэмнээн буор, таас кутан тэҥнииллэр.

Улахан болҕомто куорат киинигэр сытар уулуссалары буолбакка, кытыы оройуон суолларыгар эмиэ ууруллар. Холобура, ГРЭС оройуонугар баар Бабушкина уулуссаҕа хаһыы үлэлэрэ саҕаланан бара тураллар. Суол сабыллыыта айан сырыытын хааччахтыыр. Онон улахан мэһэй үөскээбэтин туһуттан, суолу кэрчиктэргэ арааран уочаратынан сабыахтара. Эмиэ элбэх сырыылаах, киин сытар Пояркова суолун оҥоруу эмиэ салҕаныаҕа. Бу суолга үлэлэри түүҥҥү кэмҥэ ыытар соруктаахтар. Маны тэҥэ, муус устар 15 күнүттэн Вилюйскай переулок уулуссатын капитальнай өрөмүөнэ саҕаланна. Манна сырыы эмиэ хааччахтаах. Бу Лермонтов аатынан уулуссаттан Объездной шоссеҕа диэри кэрчик учаастак буолар. Манна барыта балтараа кэриҥэ килэмиэтир усталаах суолу өрөмүөннүөхтэрэ.

“Трасса түгэх уһугар тутар-монтажтыыр үлэ саҕаланан турар. Бастакы түһүмэх быйыл алтынньы ый түмүгэр бүтүөхтээх. Иккис түһүмэҕэр бырайыактыыр-сметалыыр үлэ бара турар”, - диир Дьокуускай куорат уокуругун "Главстрой" тэрилтэ үлэһитэ Артём Кычкин.

Саха сиригэр 2019 сылтан "Куттала суох хаачыстыбалаах массыына суоллара" национальнай бырайыак салгыы түһүмэҕэ олоххо киирэр. Ол иитинэн Дьокуускай суолларын тэҥэ, региональнай  Нам, Умнас, Амма, Харбалаах, Бүлүү, Тиксии суоллара чөлүгэр түһэриллэн саҥардыллыахтара. Холобура,  Намныыр суол өрөмүөнэ салҕанар. Ааспыт сылга Үс Хатыҥ эргин 7 километрдаах суол оҥоһуллан болдьох иннинэ туттарыллан үлэҕэ киирбитэ. Быйыл Марха бөһүөлэгэр киирэр суолтан тахсыыга диэри уопсайа 3 аҥаар километр усталаах суол өрөмүөннэнэр.

Өрөспүүбүлүкэ үрдүнэн быйыл уопсайа 260 км тахса суолу өрөмүөннүөхтэрэ. Барыта 8 миллиартан тахса үп көрүллүөҕэ, онтон 4 аҥаар миллиартан тахсата федеральнай харчы. Суоллары тэҥэ өрүстэр, үрэхтэр  нөҥүө бу сылга хас даҕаны муоста тутуллан киириэхтээх. Оттон Ленин проспегар ер сыллаах өрөмүөн аны күһүн толору түмүктэнэн үлэҕэ киирэрэ күүтүллэр