Билигин хаһаайыстыбыларга маассабай төрөөһүн саҕаланна

39

Хороҕор муостаахтарга, сыспай сиэллээхтэргэ кыстык түмүктэнэрэ ыйтан ордук хаалла. Быйылгы кыһын бары хаһаайыстыбаларга соччото суохтук  ааһан эрэр. Сүрүн кыһалҕа сүөһү аһылыгар.

Соҕотох кэриэтэ 105 төбө ураа муостааҕы тутар Екатерина Атласова кыстыгы этэҥҥэ туораан эрэриттэн үөрэр. Билигин кини сааскы эрэһиимҥэ киирэн өрө тыынар. Төрүөх кэмэ буолан, үлэ буппэт.

Екатерина Атласова хаһаайыстыбата Уус-Майа улууһугар биир тарбахха баттанар хаһаайыстыбанан ааҕыллар. Эдьээн далбар хотуна 2015 сыллаахха тыа хаһаайыстыбатын министиэристибэтэ ыытар граныгар киирсэн, онно кыайыыны ситиһэн, улахан уораҕай туттан киирбит. Ол кэмтэн ыла сөбүлүүр дьарыгын ыһыктыбакка, билигин кини хас да үлэһиттээх хаһаайыстыба салайааччыта. Ол да буоллар, ынахтарын бэйэтэ көрөр-истэр. Төһө да уустук кыһын аастар, от этэҥҥэ тиийдэ. Хаһаайыстыба өрө тыынна.

"Билигин кооперациябын кытта 105 төбөлөөхпүн, онтон 34 ыанар. Ол таһынан, сылгылардаахпыт. 27 биэ, 2 атыыр. Былырыын 48 туонна үүтү туттарбыппыт, быйыл эмиэ оннук туттарар санаалаахпыт. Сүрдээх ыарахан кыстыгы аастыбыт, тымныыта да бэрт. Оттуур сирбит наһаа  эрэйдээх, урут ол сэбиэскэй союз саҕана милерация барбытынан. Ол кэнниттэн туох да үлэ бара илик. Сирбит барыта дулҕа буолла. Аны биһиги үрэхтэр тардыыларыгар олорор буоламмыт, сыл аайы ууга барбыт. Ол уубут баран биэрбэт, сайын устата турар. Инньэ гынан, техника сүүрбэт, илиинэн оттооһун. Дьигинэ, киһи сүөһүнү иитиэ эбит, от кыайтарбат", - диэн хаһаайыстыба салайааччыта Екатерина Атласова санаатын үллэһиннэ.

Чахчы, Уус-Майа улууһун Эдьээнэ үрэхтэр тардыыларыгар турар буолан, манна от хампаанньатыгар хаһаайыстыбалаахтар үгүс күчүмэҕэйдэри көрсөллөр. Ону уҕарытар сыаллаах олохтоох дьаһалата бу хайысхаҕа үлэ ыытары былааннныыр

"Бу милеративнай үлэ барарыгар даҕаны уонна нэһилиэк иһигэр тыа хаһаайыстыбытаны сайыннарарга 4 бырагыраамма үлэлии турар.  Дьиэ кэргэн ферматын сайыннарыы, оҕуруот аһын олордуу, сылгыны иитии уонна кыылы-сүөлү иитии", - диир  "Эдьээн национальнай нэһилиэк" МТ баһылыга Анастасия Адамова.

Бу хайысхаҕа үлэ  - кыстыгы этэҥҥэ туорааһыҥҥа улахан суолталаах. Оттон манна даҕатан эттэххэ, Өрөспүүбүлүкэ үрдүнэн кыстык түмүктэнэр уһугар тиийэрэ чугаһаата. Күн бүгүн, төрүөх маассабайдык барар.

"Өрөспүүбүлүкэ үрдүнэн хороҕор муостаахпыт 192 779 төбө, ол иһигэр ыанар ынахпыт ахсаана 75 729  төбө. Күн бүгүн 26 770 ньирэй төрөөн турар. Ити уопсай ынах ахсааныгар ылар эбит буоллахпытына, 35,7 быраһыана", - диэн СӨ ТХМ  сүөһү иитиитигэр департаменын сүрүннүүр исписэлииһэ Александра Петрова.

Билигин сүөһү эбии аһылыгын тиэйэр сүрүн үлэлэрэ түмүктэнниллэр. Уопсайа миэстэтигэр 50 тахса тыһ. туонна тириэрдилиннэ. Билигин таһар үлэ нэһилиэктэр икки ардыларыгар эрэ ыытыллар.