Саха тыйаатыра "Тулаайах оҕо" испэктээкили туруорар

Кыргыс үйэтэ ойууланар, охсуһуулаах-кырыктаах кэмнэр кэпсэнэр "Тулаайах оҕо” арамаан сыанаҕа дьүһүйүллэр. Режиссер Руслан Тараховскай ураты көрүүтүнэн, оччотооҕу кэм киһи кутун-сүрүн тутардыы туруорулунна. Саха тыйаатырын сыанатыгар билигин артыыстар бэлэмнэниилэрин үгэнэ. Манна бары кэриэтэ кытталлар. Ол эрэн, артыыстар араас хаттыгастаах көһүннүннэр диэн режиссер сүрүн геройу Ньырбачааны уонна Даҕанчаны үстүү артыыс толорорун туһунан эттэ.

"Тулаайах оҕо” испиктээкил толкуйдаммыта ыраатта. Үс сыллааҕыта толкуйдана сылдьыбыта уонна бу саҥа таһараан эрэбит. Ханнык баҕарар улахан испиктээкил турара өр толкуйданан баран оҥоһуллааччы. Романы барытын хабар уустук соҕус. Ол иһин айымньы сүрүн түһүмэхтэрин, барылын, хайысхатын көрдөрөбүт", - диир  Былатыан Ойуунускай аатынан Саха академическэй тыйаатырын сүрүн режиссера Руслан Тараховскай.

Испэктээкил сүрүн тематынан Бүлүү сүнньүнэн  араас омук хайдах иллэһэн, хаан холбоон бииргэ олорбуттара буолар. Далан романа историяческэй айымньы буоларын быһыытынан саха омук үгэһэ, олоҕо-дьаһаҕа барыта бу сыанаҕа көстер. Маны таһынан, туруорууга ювелир-худуоьунньук Александр Манжурьев үлэлэрэ арылхайдык көстүөхтэрэ.

Даҕанча оруолун Дьулустан Семенов, Вячеслав Лавернов уонна Семен Алексеев толоруохтара. Оттон Ньырбачаан оруолугар анаммыт артыыстар, Саха тыйатыырыгар хаһан даҕаны маннык ураты туруоруу буола илигэ диэн бэлиэтииллэр. Онон хас биир испиктээкил көрөөччүгэ хатыламмат иэйиини бэлэхтиэҕэ. 

“Наһаа интириэһинэй испиктээкил дии санаатым. Эксперемент курдук. Үһүөбүт, ол иһин атын-атыннык оонньуубут. Үстэн биир Даҕанча мин кэргэним, Слава Лавернов. Онон иккиэн оонньуохтаапыт биир күн”, - диэн   Былатыан Ойуунускай аатынан Саха академическэй тыйаатырын  артыыһа Айталина Лавернова кэпсээтэ.

Хааннаах илбистээх кыргыс үйэтин кэминээҕи кыһалҕаны, тапталы, олоҕу дьүһүйүү улахан эппиэтинэһи эрэйэр. Элбэх ааҕааччы кутун-сүрүн туппут айымньы бастакытын сыанаҕа туруоруллара көрөөччүлэргэ да, артыыстарга да долгутуулаах.

"Үйэлээх үлэ тахсан эрэрэ, киһиэхэ өссө улахан эппиэтинэс биэрэр курдук. Инньэ гынан, туох баар сырабытын-сылбабытын ууран туран үлэлии сылдьабыт", - диэтэ Былатыан Ойуунускай аатынан Саха академическэй тыйаатырын  артыыһа  Геннадий Турантаев.

Испиктээкил кэлэр нэдиэлэҕэ Саха тыйаатыра уораҕайыгар туруоруллуоҕа, үгүс көрөөччүнү муһуоҕа. "Тулаайах оҕо" айымньы сыанаҕа дьүһүйүллэрэ өр кэмҥэ ыраламмыт ыра буолар.