Эдэр ыччаты түмэр, чөл олоҕу өрө тутар улахан тэрээһин

22

Киин куоракка Саха сирин эдэр ыччатын бииргэ түмэ тардар "Поколение" диэн чөл олоҕу өрө тутар улахан тэрээһин ыытыллар. Манна Өрөспүүбүлүкэ үрдүк уонна орто үөрэх кыһаларын устудьуоннара, маны таһынан араас эдэр ыччат түмсүүлэрин көхтөөх ыччаттара кыттыыны ылаллар.

Муус устар 7 күнүттэн саҕалаан Өрөспүүбүлүкэ устудьуоннарыгар анаан "Поколение" диэн тэрээһин саҕаланна. Онтон сийиэс өрөгөйдөөх аһыллыыта "Сэргэлээх уоттара" култуура киинигэр буолла.  Бу күрэх эдэр ыччаты бииргэ түмэр сүрүн сыаллаах. Биир ый устата устудьуоннар 4 араас хайысханан бэйэлэрин дьоҕурдарын көрдөрөллөр. Ол иһигэр уран талаан, булугас өй, спортивнай дьоҕур  киирэр.

"Эдэр көлүөнэлэр түмстэн, тэрээһин ыыта сылдьабыт. Муус устар ыйтан саҕаланна, 4 сүрүн кэрдиистээх. Талааны көрдөрүү, медиа хайысха, спортивнай хайысха уонна интеллектуальнай. 2 тыһыынчаттан тахса устудьуону түмтүбүт", - диэн Хотугулуу-Илиҥҥи Федеральнай университет идэлээх сойууһун бэрэссэдээтэлэ, "Поколение" сүрүн тэрийээччитэ Александр Румянцев кэпсээтэ.

Тэрээһин  түөрт сүрүн хайысхатын тэрийээччилэр нэдиэлэнэн араарбыттар. Холобур, бу нэдиэлэҕэ уус-уран хайысха күрэхтэрэ буоллулар. Манна кыттааччылар ырыа-тойук, үҥкүү эйгэтигэр сыралаах бэлэмнэниилэрин  көрдөрдулэр. 12 бастыҥ хамаанда түмүктүүр түһүмэххэ ааста.

Хотугулуу-Илиҥҥи Федеральнай университет Физико-техническэй институтун  актыбыыстара, уус-уран хайысха чэрчитинэн үҥкүү күрэҕин финалистара бэйэлэрин санааларын үллэһиннилэр. Устудьуоннар этэллэринэн, финалга киириэхпит диэн эрэнэн, дьүүллүүр  сүбэҕэ бэйэлэрин сатабылларын көрдөрөөрүү олох эрдэттэн бэлэмнэнэн саҕалаабыттар.

Устудьуоннар айар талааннарын, сатбылларын арыйар тэрээһини Саха сирин улахан хампаанньалара өйөөтүлэр. Призовой пуонда 1 мөллүйүөн уу харчыннан, маны таһынан кыттааччылары араас сыаналаах бириистэр күүтэллэр.

Тэрийээччилэр уонна кыттааччылар этэллэринэн эдэр ыччаты бииргэ түмэр маннык үрдүк таһымнаах, тэрээһиннээх сийиэс урукку кэмҥэ буолбатаҕа. Үгүс ыччаты бииргэ түмэр, сүргэлэрин көтөҕөр тэрээһин сыл аайы ыытыллыа диэн  эрэнэллэрин   бэлиэтииллэр.