Дьокуускайга "Абилимпикс" регионнааҕы Чемпионата ыытылла турар

Идэ маастарыстыбатын үрдэтиигэ туһуламмыт күрэхтэһиигэ доруобуйаларыгар хааччахтаах, инбэлиитинэстэх уопсайа 260 киһи 31 хайысханан кыттар. Тэрээһин сүрүн былассааккаларынан 10 кэриҥэ орто үөрэх кыһата буолла. Сыллата кыттааччы ахсаана эбиллэн иһэр диэн тэрийээччилэр бэлиэтииллэр.

Уус Алдан улууһуттан төрүттээх Александр Тарабукин инфекционнай балыыһаҕа үлэлээбитэ 15 сыла. Бастаан санитарынан саҕалаан баран, кэлин үөрэнэн Дьокуускайдааҕы медицинэ коллеһын бүтэрэн, билигин медбратынан үлэлиир. Абилимпикс чемпионатыгар Медицинский и социальный уход диэн компетенцияҕа кытта сылдьар.

"Бастакыбын кыттабын, ол иһин долгуйуу эмиэ баар. Үлэлиир буоламмыт, үчүгэйдик ааһарбыт буолуо. Бэһиэ буолан кыттабыт", - диир "Абилимпикс" чемпионат кыттыылааҕа Александр Тарабукин.

Дьокуускайдааҕы медицинэ коллеһа Абилимпикс күрэхтэһиини 2019 сыллаахтан ыытар. Быйыл номнуо, 4 сылын чемпионат сүрүн былаһааккатын быһыытынан үлэлиир. Үөрэх кыһатыгар бүгүҥҥү күҥҥэ икки тыһыынча кэриҥэ устудьуон үөрэнэр, онтон 29 доруобуйатынан хааччахтаах.

"6 компетенциянан буолар. Медицинскэй социальнай көрүү, лабораторнай медицинскэй анаалыс, визаж, прикладной эстетика, тиис технига. Биһиэхэ колледж үрдүнэн 45 кыттааччы баар. Бастакы миэстэни ылбыт киһи финалга тахсар. Россияҕа баран кыттыаҕа", - диэн Дьокуускайдааҕы медицинэ коллеһын дириэктэрин инновационнай үлэҕэ солбуйааччы Александра Новикова иһитиннэрдэ.

Быйыл аан бастакытын ногтевой сервис диэн хайысха киирдэ. Манна оскуола үөрэнээччилэрэ кытталлар. Конкурсаннар оскуолаларыгар сүүмэрдээһини ааһан бу регионнааҕы чемпионакка кыттар чиэскэ тиксибиттэр.  

"Саҥа дьыл кэнниттэн өр кэм бэлэмнэммиттэрэ. Бэйэлэрин оскуолаларыгар сүүмэрдээһини ааһаннар. Биһиги базабытыгар кэлэн эрчиллэн, билигин бу чемпионакка кытта сылдьаллар", - диэн Дьокуускайдааҕы медицинэ коллеһын преподавателэ Ольга Григорьева кэпсээтэ.

Мөлтөхтүк истэр оҕолор Өрөспүүбүлүкэтээҕи коррекционнай оскуолатын 11 кылааһын үөрэнээччитэ Сахаайа Попова саҥа хайысхаҕа бэйэтин холонон көрөргө сананан, эрдэттэн үөрэнэн кыттар. Оскуолатын быйыл бүтэрэн баран дойдутугар баран иитээччи идэтин баһылыыр соруктаах.

Оттон медицинэ коллеһын устудьуона Саина Константинова чемпионакка кыттар уопуттаах. Бу сырыыга визаж уонна прикладная эстетика диэн компетенцяиларга кыттан бэйэтин тургутар.

Саха сиригэр "Абилимпикс" регионнааҕы Чемпионатыгар уопсайа 260 доруобуйаларыгар хааччахтаах оскуола үөрэнээччитэ, устудьуон, исписэлиис   31 хайысханан кытта сылдьар. Күрэхтэһии муус устар 20 - 27 күннэригэр 10 кэриҥэ араас үөрэх кыһаларыгар ыытыллар.

"Биһиги оскуолабыт баазатыгар күрүчүөгүнэн баайыы, маһы кыһыы диэн компетенциялар 2016 сыллаахтан үлэлиир эбит буоллахтарына, үс сыл биһиги изобразительное искусство диэн хайысханы эмиэ баһылаатыбыт. Быйыл биһиги оҕолорбут сүрдээх элбэх компетенцияҕа кыттаары сылдьаллар. Биллэн турар, маннык хайысхаҕа оҕону иитии, үөрэтии, угуйуу сүрдээх наадалаах", - диир СӨ истибэт оҕо анал интернат-оскуолатын дириэктэрэ Оксана Винокурова.

"Абилимпикс" тэрээһинэ инбэлиит дьоҥҥо идэ ылалларыгар, үлэ булалларыгар төһүү буолар. Түмүккэ кыайыылаахтар финалга киирэн, Россияҕа баран идэлэрин маастарыстыбатын, үөрүйэхтэрин бүтүн дойду таһымыгар үрдэтиэхтэрэ.