Күн сарсын мэҥиэ куһунан үгүс улуустарга булт саҕаланар

Сааһыттарга үөрүүлээх кэм. Билигин булчуттар сааскы куска бараары бэлэмнэнии үөһүгэр сылдьаллар. Манна улахан болҕомто мэҥиэ куска. Тулагы-Киллэм олохтооҕо, булчут Виталий Григорьев кус көппөтүн туһугар атахха иилиллэр тэрили бэйэтэ айан таһаарда.

Идэтинэн баһаарынай, элбэх оҕолоох аҕа, булчут, балыксыт, Сунтаартан төрүттээх Тулагы -Киллэм олохтооҕо Виталий Григорьев сааскы кус кэмин баттаһа, омуктуу эттэххэ "ноу-хау" айан таһаарбыт. Кини мэҥиэ куһугар атахха иилииллэр - ногавканы атыннык толкуйдаан оҥорбут. Манна төһүү Тульскай уобалас курдук ыраах сиртэн кэлбит куһа. 

"Кус ылааһынтан идея киирбитэ. Былырыын тириинэн оҥороллор этэ. Хомуут диэни өссө оҥорооччулар. Анал пластмасстан. Ханна да суох буолан хаалла оннук. Мин бростуойдук оннук гынаары гыммытым. Онтон толкуйдаан-толкуйдаан баран, идея киирбитэ, чалбаанынан оҥорорго. Табыгастаах уонна  чэпчэки", - диир булчут Виталий Григорьев.

Тутатына оҥорбут тэрилин куһун атаҕар иилэн, кэтээн көрөн барбыт, булка илдьэ сылдьыбыт. Ногавката этэҥҥэ кус атаҕын эчэппэтэх, аалбатах. Холобура, бу иннинэ тирииттэн, пластмасстан оҥоһуллубут атах тэриллэрэ кус атаҕын ыга тутар, аалар эбит буоллахтарына, Виталий Григорьев ногавката мэҥиэ куска туох да күчүмэҕэйдэри үөскэппэтэх.

Күн бүгүн, Виталий Григорьев биһиги устар бөлөхпүтүгэр анаан маастар-кылаас көрдөрдө. Биһиги көрөн турдахпытына, аҕыйах мүнүүтэ иһигэр ногавканы оҥорон, куһугар ииллэ. Хайдах иилиллэрин быһаарда.

Дьэ бу курдук, булт диэн баран муннукка ытаабыт Виталий Григорьев саҥа айыытын үгүс булчут сэҥээрбит. Сакаастар киирэн эрэллэр диэн булчут кэпсээнин түмүктүүр уонна сааһыттарга эҕэрдэтин тириэрдэр.

Манна даҕатан эттэххэ, күн сарсыҥҥыттан үгүс улуустарга булт саҕаланар. Оттон салгыы муус устар 24 күнүгэр Бүлүү бөлөх улуустарыгар, Горнайга, Лиэнскэйгэ, Мииринэй уонна Өймөкөөн улуустарыгар мэҥиэ кустаах сааскы булт саҕаланар.