Дьокуускай аэропордугар ыксаллаах үөрэх буолан ааста

Харбин-Дьокуускай хайысханан көтөн кэлбит сөмөлүөт рейсин Роспотребнадзор санитарнай быраастара көрүстүлэр. Үөрэх номоҕунан сөмөлүөккэ лихорадкалаах киһи баара билиннэ. Этин температуурата үрдүк, титирэстиир киһини быраастар, бастакынан дьонтон куоттардылар уонна туох ыарыытынан ыалдьыбыта биллиэр диэри, тутатына алтыспыт дьонун чопчулаатылар. Онтон ыарыһаҕы сөмөлүөттэн таһаараат медициинэ суһал көмөтүгэр туттардылар. Санитарнай быраастар үөрэхтэрэ Дьокуускай аэропордугар буолла. 

"Бу үөрэхтээһин сыл аайы ыытыллар. Роспотребнадзор сорудаҕынан уонна комплекснай былаан быһыытынан бу үөрэх бүгүҥҥү номоҕо диэн, Кытайтан көтөн иһэр рейскэ сөмөлүөт иһигэр ыарыһах булуллар. Уонна ол булуллан биллэрии барар. Бары сулууспалар, куорат медицинэтин тэрилтэлэрэ, суһал көмө бу үөрэххэ кыттыһаннар, булуллубут ыарыһаҕы арааран, контактаах дьону кытта үлэ барыахтаах. Онтон иккис түһүмэҕэ диэн, норуоттар икки ардыларынааҕы терминалга, таможеннай хонтуруолга эмиэ ыарыһах булуллар. Уонна ол ыарыһаҕы кытта эмиэ үлэ барыахтаах. Аан дойдуга билигин сыстыганнаах ыарыылар тыҥааһыннаах усулуобуйалара баар", - диир Роспотребнадзор тырааныспары кэтиир салаатын салайааччыта, Дьокуускай аэропордун санитарнай-карантиннай пуунун салайааччыта  Юрий Степанов.

Саха сириттэн Кытайга быһа рейс олохтоммутунан, Дьокуускай аэропордугар ыксаллаах үөрэхтэр өссө да ыытылла туруохтара. Маннык балаһыанньа тахсар түгэнигэр, тутатына миэрэ ыларга үөрэх тирэх буолар.