Чалбах утары үлэҕэ анаммыт мунньах буолла

37

Дьокуускай куорат дьаһалтатыгар бырабыытылыстыба чилиэттэрэ кыттыылаах чалбах утары үлэҕэ анаммыт мунньах буолла. Манна киин куоракка эрэ тирээбит кыһалҕаны тула буолбакка, бүтүн Өрөспүүбүлүкэ үрдүнэн балаһыанньаны дьүүллэстилэр.

Промышленнай уокурук үлэһиттэрэ тэлиэгэҕэ помпаларын тиэйэ сылдьан чалбах уутун бырахтараллар. Массыыналара алдьанан, сатыы сылдьан уокурук сиригэр үөскээбит чалбахтары кэрийтэлээн массыына, сатыы сылдьар сырыытыгар табыгастаах буоллун диэн үлэлииллэр.

Промышленнай уокурук төһө да эрдэтинэ 26 тыһыынча куб хаары бэйэтин сириттэн тиэйтэрбитин үрдүнэн, сааскы уулларыы содула элбэх. Муус устар 16 чыыһылатыттан 2 массыынанан ууну оботторон саҕалаабыттар.

"Бүгүҥҥү күҥҥэ Бабушкино уонна Кржижановского уулуссалары хачайдыы сылдьаллар. Массыыналарбыт күн аайы сарсыардаттан киэһээҥҥи диэри үлэлииллэр. Ити бэдэрээччиппит үлэлиир. Олбуору көрөр, ыраастыыр үлэһиттэр 3 помпалаахтар. 2 помпа куруутун үлэлиир, биирэ саппаас", - диир Промышленнай уокурук салайааччытын солбуйааччы Семён Иванов.

Дьокуускай куоракка сааскы уулларыы содулун туоратыыга туох үлэ ыытылла турарын Дмитрий Садовников билистэ. Бырабыытылыстыба бэрэссэдээтэлэ Андрей Тарасенко сорудаҕынан хас биирдии министиэристибэҕэ, кэмитиэккэ ууну оботторууга сир анаатылар. Ыраастааһын үлэтигэр Михаил Никифоров салайааччылаах бырабыыталыстыба хамыыһыйата үлэлиэҕэ, аны мантан ыла киин куоракка сааскы уулларыы содула бырабыыталыстыба хонтуруолугар киирэр. 

"Куорат коммунальнай сулууспалара хаарга уонна уу оботторуутугар үлэни кэмигэр ыыталлар. Ол эрэн, көмө син биир наада. Онон сиэттэрэн биһиги кэккэ сорудахтары биэрдибит. Министиэристибэлэр хас биирдии уокурукка ананнылар. Өссө күүскэ үлэлиэхтэрэ диэн эрэнэбит", - диэтэ СӨ бырабыытылыстыбатын бэрэссэдээтэлин бастакы солбуйааччы Дмитрий Садовников.

Күн бүгүн "Жилкомсервис" тэрилтэ 25 массыыната ууну оботторууга үлэлии сылдьаллар. Уопсайа 3150 куб ууну хачайдаабыттар. Түүҥҥү өттүгэр тоҥорор буолан сүрүннээн үлэлэр сарсыарда 10 чаастан киэһэ 10 чааска диэри ыытыллаллар. Түүнүн тоҥорбот буоллаҕына, халлаан сылыйдаҕына тохтобула суох төгүрүк суукка ууну оботтуоруохтара.

"Күн ахсын массыына ахсаанын элбэтэн иһэбит. Хачайдыыр сабардам эмиэ улаатан иһэр. Ол курдук сүрүн үлэлэр биһиэхэ иннибитигэр тураллар, онно күргүөмүнэн күүскэ бэлэммит. Холобур, күҥҥэ тыһыынча кубка чугаһаан эрэбит. Сүнньүнэн, 800-900 кубу хачайдыы сылдьабыт. Урукку сыллары кытта тэҥнээн көрдөххө, чалбах тахсыыта, түүн сылаас температура буоллаҕына элбэх тахсар. Билигин биһиэхэ түүҥҥү өттүгэр температурабыт сөрүүн соҕус, ол иһин түүн уубут тоҥор. 3-4 күнүнэн күүстээх ириэриини кэтэһэбит,үлэлииргэ бэлэммит", - диэн "Жилкомсервис" тэрилтэ дириэктэрэ Юрий Спиридонов иһитиннэрдэ.

Аны мантан ыла киин куорат, уокурук салалталара эрэ буолбакка бары министиэристибэлэр күүстэрин түмэн, Дьокуускай куораты чалбахтан, сааскы уулларыы содулуттан быыһыырга үлэлиэхтэрэ.