Бүгүн Россия үрдүнэн донор күнэ

Бэлиэ күнү көрсө Дьокуускайга хааны туттарыы нэдиэлэтэ саҕаланна. Акцияҕа доруобуйатын туругунан донор буолар кыахтаах 18 сааһыттан ким баҕалаах кыттыан сөп, сүрүннээн араас тэрилтэлэр үлэһиттэрэ кэллэктиибинэн кэлэллэрэ күүтүллэр.

Амма улууһун Болугур нэһилиэгиттэн төрүттээх, Дьокуускайдааҕы медицинэ коллеһын устудьуона Ким Софронов хаан туттара кэлбит. Ким үөрэҕин үрдэтэн быраас буолар былааннаах.Уол бу бастакы сырыыта буолбатах, эрдэ туттара сылдьан баран донор буоларга санаммыт. Бэйэбэр даҕаны көдьүүстээх, дьоҥҥо да туһаны аҕалабын диэн санаалаах.

Дойду үрдүнэн муус устар 20 күнүгэр донор күнэ бэлиэтэнэр. Бэлиэ күнү көрсө бары регионнарга дьону хааны туттарарга көҕүлүүр сыаллаах тэрээһиннэр ыытыллыахтара. Дьокуускайга бу нэдиэлэ саҥатыттан донор нэдилэтэ ыытыллан бара турар. Акцияҕа доруобуйатын туругунан донор буолар кыахтаах 18 сааһыттан ким баҕалаах кыттыан сөп, сүрүннээн араас тэрилтэлэр үлэһиттэрэ коллективынан кэлэллэр.

"Доруобай донор буолуохтаах. Ыйааһына 50 киилэттэн кыра буолуо суохтаах, анимията суох буолуон наада. Ол аата тимирэ нуормалаах буолуохтаах, дьахтарга 120-130, эр киһиэхэ 130-140. Итиэннэ кини хроническай ыарыыта суох буолуохтаах. Улахан ыарыылаах дьон туттарбаттар", - диэн хаан тутар станциятын трансфузиолог бырааһа Алиса Мартынова этэр.

Доруобай киһиэхэ хааны туттарыы, киһи туругар туох да куһаҕан дьайыыта суоҕа дакаастанан турар. Төттөрүтүн көмөлөөх диэн исписэлиистэр бэлиэтииллэр. Дэлэҕэ, былыр хааннааһыны эмтиир сыаллаах киэҥник тутталлара. Бастаан хааны туттарааччы докумуоннаах регистратураҕа кэлэр. Салгыы анкета толорор, бырааска көрдөрөр, хаан аналиһын туттарар.

"Биһиги уопсай анаалыс ылабыт, хаан бөлөҕүн быһаарарга. Сүрүн үлэбит онно сытар. Бастакы уонна үһүс хаан бөлөҕө элбэх", - диир хааны тутар станция лабораторнай технига Владимир Заболоцкай.

Хааны туттара кэлэр киһи 3 күн иннинэ сыалаах-арыылаах астан, кыраадыстаах утахтан аккаастаныахтаах, үчүгэйдик сынньанан утуйуохтаах. Күннэтэ станцияҕа 30-40 киһи кэлэн хаанын туттарар.   

Маннык акциялар дьону хааны туттарыыга, итиэннэ донор ахсаанын элбэтиигэ көҕүлүүллэр, оттон балыыһалары хаанынан хааччыйыы биир тыын суолталаах тэрээһининэн буолар.

"Уопсайа Өрөспүүбүлүкэ үрдүнэн 10 тыһ. кэриҥэ донор баар. Онтон бу Дбокуускай куоракка биһиги станциябыт үрдүнэн 5 600 баар. Өрүү туттарар донор 2 тыһ. тахса", - диэн хаан тутар станциятын трансфузиолог бырааһа Лена Максимова кэпсээтэ.

Онон доруобуйатын туругунан туох даҕаны хааччаҕа суох дьону хааннарын кэлэн туттарарга ыҥыраллар. Эн туттарбыт хаанын ким эмит олоҕун быыһыан сөп.