Ынах маассабай төрөөһүнэ буолан үүт-ас дэлэйэн эрэр

35

Дьокуускай ырыынагар хаһаайыстыбалартан үүт, сүөгэй тиһигин быспакка кэлэ турар. Оттон олохтоох эт-балык билигин таһырдьанан-иһирдьэнэн тымнытар хоппоҕо эрэ атыыланар буолан, атыы аччаабыт.

Константин Винокуров ырыынакка эт атыылаабыта быданнаата.Сүрүннээн таба этин атыылыыр. Таһырдьа ириэрэн эти лаарга хаалаан атыылыыллар. Таба этин киилэтин 450 солкуобайтан саҕалаан атыылаһыахха сөп. Маны тэҥэ сылгы, ынах этэ эмиэ баар. Билигин ырыынакка дьон кэлиитэ көҕө суох, онон атыы улаханнык барбат диэн Константин Николаевич этэр.

Кыһыҥҥыны кытта тэҥнээтэххэ, балыкка сыана кыралаан түспүт курдук. Холобур, собону киилэтин 200 саҕалаан быспыттар. Сордоҥ 150, уомул 600, муксун эмиэ 600, чыыр 800. Ону тэҥэ, араас көрүҥ балык эмиэ элбэх. Тоҥ балыгы тэҥэ, отону эмиэ атыылаһыахха сөп, киилэтэ 350 солкуобайга турар. Владимир Винокуров кэргэнин кытта кыралаан бэйэ аһын ылан амсайаары ырыынакка кэлбит: 

"Сүрүннээн эт ыла кэлэбит. Ырыынак сыаната кытаанах, үлэлээбэт киһи киирбэт сыаната. Көрөгө да сыаната наһаа ыарахан. Туох барыта ыараабыт".

Оттон үүт ас билигин кэм дэлэйэн эрэр. Ынах маассабай төрөөһүнэ салҕанар, онон хаһаайыстыбалартан үрүҥ ас тиһигин быспакка кэлэр. Сүөгэй, арыы, чөчөгөй сүрүннээн илин эҥэр улуустартан киирэр, билигин суол сабыллан киин улуустар көхтөөтүк  туттараллар. Быырпах балтараа лиитэрэтэ 180, сүөгэй үс- түөрт мөһөөх, суорат 120 турар, иэдьэгэй 500 грамма - 200 мөһөөх, үүт лиитэрэтэ 100.

"Суорат, сүөгэй, иэдьэгэй көрөбүт. Ол пенсионер улахан тугу көрүөхпүнүй. Кырдьаҕас дьон аһылыкпыт да кыра буолар. Ол гынан баран, чэпчэки соҕуһа буоллар, 1 кг арыыларын ыйыпппытым 1,5 тыһыынча дииллэр. Наһаа сүрдэммиттэр, сиэри таһынан барбыттар", - диэн Дьокуускай олохтооҕо Василий Саввинов санаатын үллэһиннэ.

Эккэ сыана туһунан этэр буоллахха, ынах этэ 6 мөһөөхтөн,  убаһа этин 750 саҕалаан амсайыахха сөп. Сибиинньэ этэ киилэтэ 500 солкуобайга турар. Бэйэ бородууксуйата да, тастан да киирбит эт баар. Бу ый бүттэҕинэ сиэмэ хортуоппуй атыыга тахсыаҕа. Билигин хортуоппуйу киилэтин, 70 солбкуобайга атыылыыллар.