Сайыҥҥы ойуур баһаардарыгар бэлэмнэнии үгэнэ

Авиалесохрана баһаарынай-десантниктара үүммүт сылга үөрэхтэрэ түмүктэнэн эрэр. Кинилэр сыллата айылҕа баһаара эбиллэ турарынан, быйыл өссө эбии саҥа байыастары үлэҕэ ыллылар. Эдэр десантниктар сатабылларын тургутан көрүү Тулагы -Киллэмҥэ буолла.

Хамаанда бэриллэн, Авиалесохрана байыастара Ми-8 көтөр аалга сыыдамныы  хамсанан киирэллэр. Күн бүгүн, Тулагы-Киллэм мыраанын тэллэҕэр, сайыҥҥы ойуур баһаардарыгар бэлэмнэнэр сыаллаах-соруктаах үөрэтиилэр ааһаллар. Уолаттар бүгүн анал троһунан аллараа түһэллэр.

Барыта инструкциянан, үөһэттэн-алларааттан анал кэтиир дьонноох үөрэтиигэ, күн бүгүн Авиалесохарана 3 салаатын: Үөһээ-Бүлүү, Бүлүү уонна Тааттатааҕы филиал байыастара үөрэтиигэ сылдьаллар. Бу иннинэ үөһээ уһун остуолбаттан түһүү эбит буоллаҕына, билигин вертолеттан субуллар, хамсыы турар троһунан  аллараа түһүү ыытыллар. Манна биллэн турар, аан бастаан уопуттаах, кырдьаҕас үлэһиттэри түһэрэллэр.

"Урут ыстаммыт, уопуттаах буоламмын, эдэрдэр мин кэннибиттэн түһэллэр. Саха сирин оройуоннарынан сылдьабыт. Сайын үтүөтүн онон билбэппит. Үлэҕэ сэрэхтээх буолуохха наада, оччоҕо барыта көстөн иһиэҕэ ", - диир "Авиалесохрана" тэрилтэ Үөһээ Бүлүүтээҕи салаатын десантник – баһаарынайа Николай Семенов.

Чахчы маннык ыксаллаах, суһал, киһиэхэ кутталы үөскэтэр үлэҕэ улахан сэрэх наада. Ол иһин бу иннинэ байыастар теоритиеческай чааһын ымпыктаахтык ааһан, аны практикатыгар киирэллэр. Манна улахан төһүү, инструктордар үлэлэрэ.

"Бу 150 киһиттэн 20 киһи түһүүгэ дьарыктана кэллилэр. Уопсайа түһүүгэ дьарыктаммыт 555 киһи буолла. Манна парашюттарын хайдах хомуйбуттарын, барытын сөпкө иилибиттэр, кэппиттэр дуу, суох дуу диэн бэрэбиэркэлиибит. Уонна былаһаакка дьуһуурнайа баар, кини вертолет анныгар страховкаҕа турар. Туора түспэттэрин, охтубаттарын гына хонтуруоллуур, көрөр-истэр", - диэн "Авиалесохрана" тэрилтэ Дьокуускайдааҕы салаатын инструктора Владимир Осипов иһитиннэрдэ.

Бу курдук, билигин ыксаллаах-быһыы майгы эйгэтин үлэһиттэригэр үөрэтии, бэлэмнэнии үгэнэ бара турар. Маны кытта тэҥҥэ, быйыл Авиалесохрана  байыастарын ахсаана биллэ элбээтэ.

"Быйыл уопсайа биһиэхэ 150 киһиэхэ миэстэ көрөннөр, оччо киһини үлэҕэ ыламмыт, барыларын үөрэхтээтибит. Бу бүтэһик курс буолар. Дьарык кэнниттэн бары десантник – баһаарынай буоллар. Кэрчиктэринэн араартаан, Сахабыт сирин араас муннутарыгар баар авиа салаалартан кэлэн үөрэнэннилэр. Быйылгы баһаар кэмигэр 100% бэлэммит", - диэн  "Авиалесохрана" тэрилтэ Дьокуускайдааҕы салаатын сүрүн лётчик – кэтээччитэ Николай Копырин этэр.

Эрдэттэн бэлэм буолуон - баһаар кэмин этэҥҥэ аһардыан диэн сыаллаах үөрэтиилэр манан түмүктэннилэр.