Өрөспүүбүлүкэ үрдүнэн өрүстэргэ кыһыҥҥы суоллар сабыллаллар

Бүгүҥҥү күҥҥэ өрүһүнэн сырыы, чуолаан, Өлүөнэ эбэнэн сабыллан турар. Ол курдук, муус устар 17 күнүгэр Хатас-Павловскай хайысханан суолу, хамыыһыйа көрөн баран, сырыыны тохтотто.

Этиллибитин курдук, ааспыт субуотаттан саҕалаан сүрүн өрүһүнэн - Өлүөнэ уҥуор кыһыҥҥы суолунан туоруур көҥүллэммэт буолла. Бастаан муус устар 15 күнүттэн Дьокуускай - Аллараа Бэстээх хайысханан сырыы бобуллубута, салгыы өрөбүлгэ Кангалас - Суотту хайысхата сабыллыбыта. Онтон бэнидиэнньиктэн Хатас-Павловскай өрүһү туоруур суолунан тыраанспар бары көрүҥэ сылдьара бобулунна. 

"Быйыл мууспут халыҥ, кыһыммыт тымныы этэ, хаарбыт да элбэх. Хаар элбэх буолан, улахан ириэрии баран, өрүскэ кыһыҥҥы суолга киирэр буор суолун учаастактара мөлтөөтүлэр. Кыра массыыналар сатаан сылдьыбат буоллулар. Амма, Умнас, Сангаар, Лючинскай, Сэбээн Күөл суолларбыт сабылыннылар. Муус устар 20 күнүгэр диэри аһаҕас хаалыахтара Анабаар кыһыҥҥы суола, Удачнайтан Үрүҥ Хайаҕа диэри. Уонна Булуҥ улууһун Тиксии- Уус Яна кыраныыссатыгар диэри", - диэн СӨ массыына суолларын салалтатын эксплуатацияҕа салаатын начальнига Александр Шипошин иһитиннэрдэ.

Өрөбүл күн, муус устар 16 күнүгэр, бүтэһик көҥүл күнү баттаһа Хатас-Павловскай суолугар уҥа, хаҥас кытылтан тимир көлөлөөхтөр тиһигин быспакка субуруһаллар. Быйыл хаар олус халыҥ буолан, ол ууллан бүтүүннүү уунан көрөн турар. Мантан ыла өссө да ууллуо турдаҕа. Кыра массыыналарга айан төһө даҕаны уустугун үрдүнэн, айаннааччылар син биир аҕыйаҕа суохтар. 

Онтон Даркылаахха Дьокуускай- Аллараа Бэстээх хайсханан төһө даҕаны суолу саппыттарын үрдунэн, кэлии-барыы сырыыта тохтуура биллибэт. Кыһалҕалаах дьон биир биэрэктэн атын биэрэккэ тиксэр инниттэн, син-биир айанныырыгар күһэллэр. Суол сабылларын туһунан туһааннаах үлэһиттэр эрдэттэн сэрэпиттэрэ. Ый саҥатыттан айан сырыытыгар ыйааһынынан хааччахтааһын олохтоммута. Билигин өрүскэ киириигэ шлагбаум аһаҕас буолан, дьон бэйэтин кутталыгар, эппиэтинэһигэр айанныырын тохтоппот. Маныаха ГИМС инспиэктэрдэрэ суоппардарга сэрэтии тэрээһинин ыыталлар, өйдөтөр кумааҕылары түҥэтэллэр. 

Кэрээнэ суох суоппардар ыам ыйыгар диэри өрүһү сүүрдэн туорууллар. Онон өрүс суола сабыллыбытын кэнниттэн, айанныыртан туттунуҥ диэн инспиэктэрдэр сүбэлииллэр. Билигин дьону таһар салгын олбохтоох суудуналар сырыылара саҕаланан эрэр. Икки Хивус 203 түөлбэттэн уонна Аллараа Бэстээхтэн Саха сирин тимир суоллара вокзалтан дьону таһаллар. Маны тэҥэ,   аҕыйах хонугунан 202 микрооройуонтан дамба сириттэн эмиэ салгын сыттыктаах суудунулар үлэлэрин саҕалыахтара. Айан төлөбүрэ барыллаан ааҕыынан 1800 солкуобайга тэҥнэһиэҕэ.