Өймөкөөннөөҕү дьиэ кэргэҥҥэ иитиигэ көмөнү оҥорор киин

Хас биирдии оҕо дьиэ кэргэҥҥэ наадыйар. Бу хайысхаҕа өрөспүүбүлүкэҕэ сүҥкэн үлэ ыытыллар. Өймөкөөн улууһугар дьиэ кэргэҥҥэ иитиигэ көмөнү оҥорор киин үлэлиир. Манна Саха сирин үгүс улууһуттан ыарахан балаһыанньаҕа түбэспит оҕолор биир дьиэ кэргэн курдук олороллор.

2018 сыллаахтан Өймөкөөннөҕү дьиэ кэргэҥҥэ иитиигэ көмөнү оҥорор кииҥҥэ олорор Сергей Кривошапкин, бииргэ олорор дьиэ кэргэнигэр сарсыардааҥҥы чэбдигирдэр дьарыгы оҥотторор. Уол оҕо эдьиийин кытта олох ыарахан очуругар оҕустаран, 5 сыллааҕыта Уус-Ньаратаа5ы оҕо киинин булбута. Билигин Сергей манна күн солото суох киһи, үөрэҕин кэнниттэн сөбүлүүр тустуутугар сүүрэр.

"Тутсууга сылдьабыт. Тренербыт Дьулустаан Егорович диэн ааттаах. Сотору-сотору күрэхтэһиилэргэ барабыт. Томторго, куоракка, Белогорск, Биробиджан сылдьыбыппыт. Үһүс миэстэ буолбутум. Тренербыт үчүгэй, барытын быһаарар, үөрэтэр", - диир Өймөкөөннөҕү дьиэ кэргэҥҥэ иитиигэ көмөнү оҥорор киин иитиллээччитэ Сергей Кривошапкин.

Күн бүгүн, Өймөкөөннөҕү дьиэ кэргэҥҥэ иитиигэ көмөнү оҥорор кииҥҥэ Сергей Кривошапкин курдук, уопсайа Өрөспүүбүлүкэ муннугуттан барытыттан, 23 оҕо 5 дьиэ кэргэнинэн хайдан быр-бааччы олороллор. История кэрэһэлииринэн аан бастаан,  1947 сыллаахха Өймөкөөн улууһун Өймөкөөнүгэр бастакы оҕо дьиэтэ арыллыбыта, ол кэнниттэн 1960 сыллаахха бу дьиэ оройуон киинигэр көһөрүллэн, билигин Өрөспүүбүлүкэҕэ тарбахха баттанар, социальнай хайысхалаах тэрилтэнэн ааҕыллар

Уус-Ньаратааҕы оҕо киинэ Саха сиригэр аан бастакынан Гмайнеровскай иитии барылынан үлэлээн саҕалаабыта, ол эбэтэр  дьиэ кэргэнинэн арааран олордору олоххо Уус-Ньаралар киллэрбиттэрэ. Манна холобура, бииргэ төрөөбүттэр арахсыбакка, биир ыалга киирэллэр. 1983 сыллаахтан үлэтигэр бэриниилээхтик, номнуо утумэн оҕону алаһа дьиэттэн көтүппүт, "Доҕордоһуу" уордьан кавалера, 95 сыллаахтан оҕо киинин салайааччыта,  амарах сүрэхтээх Людмила Неустроева бу иитии барыла көдьүүстээҕин тоһоҕолоон этэр.

"Дьиэ дьиэ курдук оҕолор олороллор. Бырааттыылар, балтылыыллар бары бииргэ, саастарынан арахсыбаттар. Маннык олорбуппут ыраатта, 1990 сылтан ыла. Выпускникпыт элбэх, холобура, мин бэйэм выпускниктарым 30 тахсалар. Уонна саастара ырааттаҕа, 50 аастахтара ди. Бары үрдүк үөрэхтээхтэр, үлэлээхтэр, кэргэннээхтэр, оҕолоохтор", - диэн Өймөкөөннөҕү дьиэ кэргэҥҥэ иитиигэ көмөнү оҥорор киин салайааччыта Людмила Неустроева кэпсээтэ.

Биллэн турар, олох ыарахан моһолугар түбэспит кыра дьону көрүү-истии улахан эппиэтинэстээх. Киин үлэһиттэрэ кырдьык, үлэлэригэр бэриниилээхтэр. Хас биирдии оҕоҕо хас да хайысханан улахан болҕомто ууруллар. Онно саамай сүрүнэ - уйулҕа чааһа. Өймөкөөннөҕү дьиэ кэргэҥҥэ иитиигэ көмөнү оҥорор киин педагог-психолога  Светлана Николаева:

"Методикабыт релаксиционнай. Тоҕо диэтэххэ, биһиги оҕолорбут тактильнай көрүүгэ наһаа наадыйаллар. Оҕолор адаптация баралларыгар, бэйэлэрин булуналларыгар".

Хас биирдии оҕоҕо төрөппүт наада. Кыра киһи олоҕор - төрөппүт оруола сүҥкэн. Эрэнэбит, Уус-Ньаратаа5ы оҕо киинин иитилээччилэрэ, олус  үчүгэй көрүүгэ-истиигэ сылдьан, бары этэҥҥэ олох киэҥ аартыгар үктэниэхтэрэ. Олохторун суолун сөптөөхтүк тобулуохтара.