III төгүлүн ыытыллар Өрөспүүбүлүкэтээҕи волейбол күрэҕэ

Ааспыт нэдиэлэ бүтэһик күннэригэр Дьокуускайга III төгүлүн ыытыллар Өрөспүүбүлүкэтээҕи волейболга күрэх түмүктэннэ. Манна 1975-1993 сылларга оскуоланы бүтэрээччилэр хамаанда туруоран кытыннылар. Барыта 32 хамаанда күүһүн холонно.

Бу күннэргэ "Кыайыы 50 сыла" спорт дыбарыаһыгар, Саха сиригэр физкультурнай хамсааһын 100 сылыгар анаммыт, киэҥ хабааннаах 3 төгүлүн ыытыллар волейбол күрэҕэ буолан ааста. Бу күрэх 1975-1993 сылларга оскуоланы бүтэрбит дьоҥҥо анаан ыытыллар. Аҕа саастаах эр дьон уонна дьахталлар хамаанда туруорунан көхтөөхтүк кытыннылар. 

"Толкуй киирбитэ, маннык күрэхтэһиини тэрийиэххэ диэн уонна бастакы оонньуубут 2019 сыллаахха буолбута. Быйыл үһүс Өрөспүүбүлүкэтээҕи күрэхпит буолар. Ыраахтан-чугастан уопсайа 12 выпустан 32  хамаанда баар. 384 кыттааччы кэллэ. Саамай саастаах кыттааччыбыт, быйыл 72 саастаах киһи баар", - диэн күрэх тэрийээччитэ Михаил Гуляев кэпсээтэ.

Быйыл эмиэ кыайыы кубогын иһин курэхтэһэр хамаандалар быыстарыгар былырыыҥҥы кыайыылахтар бааллар. Ол курдук  Хотугулуу-Илиҥҥи федеральнай университет учуутала, Саха сирин волейболистарын бырабылыанньатын чилиэнэ  - Семен Сабарайкин 3 сылын  көхтөөхтүк кыттар. Аҕа саастаах табаарыстарбытын холобур оҥостон, үтүө үгэс ситимин тутабыт диэн санаатын үллэһиннэ.    

"Былырыын сүрдээх тыҥааһыннаах оонньууга 87 выпусктары кытта күөн көрсүһүүгэ кыайыылаах тахсыбыппыт. Быйыл эмиэ хайдах эрэ бастаатарбыт диэн, сылы быһа дьарыктанаммыт, бу күрэхтэһэ сылдьабыт.  Бүгүн эмиэ олору кытта оонньуохтаахпыт. Хайдах табылларын былаһаакка көрдөрүөҕэ", - диир күрэх кыттыылааҕа Семён Сабарайкин.

Күрэх кыттыылаахтара сыл устата бэлэмнэнэн кэлбиттэр. Бу тэрээһиҥҥэ анаан Сахабыт сирин араас муннугуттан, 20 тахса улуустан араас кытааччы кэлбитэ.

"Олус улахан хабааннаах, дьону чөл олоххо уонна эдэр ыччакка холобур буолар диэммин, сылын аайы сэргээн хамаанда хомуйан кытта сатыыбыт", - диэн күрэх кыттыылааҕа Марьяна Атласова санаатын үллэһиннэ.

3 төгүлүн ыытыллар волейбол курэҕэр урукку сылларга бэриниилээхтик кыттыбыт дьону чиэстээтилэр, волейбол спорт көрүҥүн курдук сайдарыгар бэйэлэрин кылааттарын киллэрбит дьоҥҥо грамоталары, бэлэхтэри туттардылар. Бэлиэтээн эттэххэ, Семён Егорович Афанасьевака Өрөспүүбүлүкэ бочуоттаах спорт бэтэрээнин аатын иҥэрдилэр. 

"Өрөспүүбүлүкэ муннкутарыттан барытыттан кэлэн, үс күн устата волейболлууллар. Бэйэтэ волейбол бырааһынньыгын курдук буолар. Биһиги эмиэ, 83 сыллаах выпусктар, кыргыттарга уонна уолаттарга хамаандалаахпыт", - диэн Семён Афанасьев эттэ.

3 күннээх күүстээх киирсии түмүгүнэн, быйылгы күрэх кыайыылаахтара билиннилэр. Ол курдук, эр дьоннор икки ардыларыгар 1992 сыл уонна дьахталларга 1993 сыл бүтэрээччилэрэ өрөгөй үөрүүтүн биллилэр.