Саха сиригэр бүтүн россиятааҕы үлэ дьаарбаҥката

Саха сиригэр үлэ дьаарбаҥкатын бүтүн россиятааҕы түһүмэҕэ хас даҕаны улууһу хабан биир кэмҥэ буолла. Тэрээһин Дьокуускайы тэҥэ, Алдан, Нерюнгри, Ленскэй, Мирнэй, Бүлүү куораттарыгар уонна Хаандыга бөһүөлэгэр ыытыллынна. Уопсайа 60 тэрилтэ 11 тыһыынча үлэ миэстэтин туруорда.

"Россия - мин историям" түмэл, бөдөҥ үлэ дьаарбаҥкатын миэстэтигэр кубулуйда. Сарсыардаттан саҕалаан элбэх киһи тоҕуоруста. Киин куоракка эрэ буолбакка, улуустарынан тэритэлэргэ ханнык үлэ миэстэтэ баарын эмиэ сиһилии билсиэххэ сөп.

Саха сиригэр үлэ дьаарбаҥкатын бүтүн россиятааҕы түһүмэҕэ хас даҕаны улууһу хабан, биир кэмҥэ буолла. Тэрээһин Дьокуускайы тэҥэ, Алдан, Нерюнгри, Ленскэй, Мирнэй, Бүлүү куораттарын уонна Хаандыга бөһүөлэгин хапта. Уопсайа 60 тэрилтэ 11 тыһыынча үлэ миэстэтин туруорда. Тэрээһиҥҥэ кэлбит дьоҥҥо үлэ булалларыгар ыйан-кэрдэн биэрэрэргэ дьарыктаах буолуу киинин психологтара үлэлэһэллэр. Кинилэр резюме суруйарга көмөлөһөллөр, бэйэлэрин кыахтарын, билиилэрин сөпкө туһаналларыгар сүбэлииллэр. 

"Биһиги десант оҥорбуппут. Өрөспүүбүлүкэ Дьарыктаах буолуу киинин  инспиэктэрдэрэ эмиэ кэлэн олороллор. Тута профориентация оҥоробут Холобур, ханнык идэҕэ, үлэҕэ сөп түбэһэрин этэбит. Кини ол кэннэ үлэ биэрээччигэ барыан сөп", - диир СӨ нэһилиэнньэ дьарыктаах буолууга киинин дириэктэрэ Роза Олесова.

Дьаарбаҥкаҕа нэһилиэнньэ араас араҥата барыта кыттар. Холобура, үөрэхтэрин бүтэрбиттэр эрэ буолбакка, устудьуоннар кытта кэлэн консультация ылыахтарын сөп. Маны тэҥэ, эбии идэлэргэ хайдах үөрэнэр туһунан эмиэ сиһилии билсэр кыахтаахтар. Эдэр дьону кытта саастаах дьон кэлэн эмиэ үлэ ыйыталаһар. Өлүөхүмэттэн төрүттээх Захар Никитин муосчут, мас ууһа. Үлэ миэстэтин булаары дьаарбаҥка буоларын истэн кэлбит.

Манна улахан промышленнай, бүддьүөт тэрилтэлэртэн саҕалаан, чааһынай хампаанньалар кытталлар. Сүрүннээн рабочай идэлэргэ үлэһиттэр наадалар, ону тэҥэ быраастар, учууталлар, иитээччилэр эмиэ.

"Биһиги биэс филиаллаахпыт. Онно иитээччилэр, иитээччи көмөлөһөөччүлэрэ, повардар наадалар. Кэҥээн иһэбит, сыл ахсын саҥаттан саҥа филиал арыллар", - диэн Дьокуускайдааҕы оҕо сайдар киинин сэбиэдиссэйэ  Мария Уххан этэр.

Муус устар 14 күнүнээҕи туругунан, өрөспүүбүлүкэ үрдүнэн 29 тыһыынчаттан тахса киһи үлэтэ суох. Оттон уопсай үлэтэ суох буолуу көрдөрүүтэ аччаан, 5,8 бырыһыаҥҥа тэҥнэспит. Оттон дьарыктаах буолуу кииннэригэр учуокка биэс тыһыынчаттан тахса киһи турар.