Саха циркэтигэр "Земля мамонта" диэн ааттаах саҥа туруоруу сүрэхтэннэ
Режиссерунан Мария Харлампьева-Попова уонна Москваттан анал бөлөх кэлэн үлэлээтэ. Испиктээкилгэ анал үөрэхтээх акробаттар, эквилибристар, жонглёрдар, хотугу харамайдары иитэр дрессировщиктар, балет артыыстара кытыннылар. Манна сүрүн оруолу, Саха циркэтигэр 25 сыл устата үлэлээбит талааннаах артыыс, Василий Атласов толордо. Этно-шоу 1 сыл устата бэлэмнэннэ.
“Биир сыл буолла бэлэмнэнии. Москва режиссёрдарын кытта бииргэ үлэлээммит оҥордубут диэххэ сөп. 200 тахса көстүүм тигилиннэ, мамонт, мамонт оҕото тыыннаах курдук хаамаллар. Уонна ханна да көстүбэтэх шоу буолан таҕыста диэн эрэнэбит. Доҕотторбут, коллегаларбыт орто азияттан, Астана, Бишкек, Алма Аты, Кыргызстан, Душанбе цииркэлэрэ кэллилэр. Кинилэри кытта, холобур, күһүн гостуруоллуохпутун баҕарабыт”, - диэн СӨ Судаарыстыбаннай циркэтин дириэктэрэ, уус-уран салайааччыта Сергей Расторгуев иһитиннэрдэ.
"Земля мамонта" туруоруу элбэх саҥа нүөмэрдээх. Онтон биирдэстэрэ "воздушные мачты" диэн бөдөҥ нүөмэр көрөөччү кутун тутта. Испиктээкил саҥа нүөмэрдэри тэҥэ, саҥа көстүүмнэринэн, тэтимнээх музыканан доҕуһуолланан ураты. Манна анал байыаннай эпэрээссийэ кыттыылаахтарын дьиэ кэргэттэрэ уонна кыра дохуоттаах ыаллар оҕолоро босхо киирэллэр. Этно-шоу муус устар 30 күнүгэр диэри буолуоҕа.
