Эти-хааны чөлүгэр түһэрэргэ билигин тоҕоостоох кэм

Халлаан сылыйан таһырдьа дьон сырыыта элбээтэ. Дьокуускайдааҕы сынньалаҥ пааркатыгар сарсыардаттан хаалыктаах хаамыынан дьарыктанар дьон-сэргэ тоҕуоруһар.

Дьокуускайдааҕы сынньалаҥ пааркатыгар "Сканди  дьиэҕэ" чөл олоҕу өрө туппут дьон бээтинсэ ахсын мустан, дьарыктарын саҕалаабытынан бараллар. Олортон биирдэстэрэ бэрт бэһиэлэй, быйыл 75 хаарын санныгар уулларбыт Матрена Егорова буолла. Кини 2017 сылтан ыла тиһигин быспакка дьарыктанар.

"Дьарыктанар бириэмэҕэ киһи сэргэхсийэ. Сыаллаах-соруктаах буолаҕын, эрдэ тураҕын, суунаҕын-тараанаҕын, үөрэ-көтө торуоскаҕын, рюкзаккын ыллын, сүктүн даҕаны ханна эрэ баран хааман кэлэҕин. Доруобуйаҕа кырдьык туһалаах, онон кырдьаҕастар, эдэрдэр, оҕолор да буоллун, салгыҥҥа сылдьыҥ, сканди хаамыынан хаамын", - диир Дьокуускай олохтооҕо Матрёна Егорова.

Айылҕаҕа ыраас салгыҥҥа дуоһуйа хаамартан туох үчүгэй кэлиэй. Дьарыктана кэлбит дьон, сүргэлэрэ көтөҕүллэн үөрэ-көтө сылдьаллара ону туоһулуур. Успуордунан дьарыктаныы доруобуйаҕа эрэ буолбакка, киһи күннээҕи туругар үтүө дьайыылаах.

Таһырдьа халтараан буолан, нэдиэлэҕэ иккитэ спорт комплекс иһигэр уонна биир күн чэбдик салгыҥҥа дьарыктаналлар. Инструктордара таҥастарын-саптарын көрөн, техникэлэрин чочуйан, хас биирдиилэригэр болҕомтолоох сыһыаннаах. Сканди дьиэ инструктора Владимир Иванов:

"Биһиги кулууппут олохтоммута быйыл сэтинньи ыйга 10 сыла буолуохтаах. Манна хаамар дьон туһунан эттэхпинэ, элбэх киһи хаамыыттан доруобуйатын көннөрөн, холобура, илии-атах үчүгэйдик үлэлиирин наадатыгар туһаннылар".

Хаалыктаах хаамыы устуоруйатыттан ыллахха, бу дьарык ыраах Финляндия дойдутуттан силиһин-мутугун ылар. Скандинавскай хаамыыны бастаан Марко Кантанев ааттаабыта. Хайыһардьыттар сайыҥҥы өттүгэр икки илиилэригэр хаалык тутан баран хаамыылара эбэтэр сүүрүүлэрэ итинник ааттаммыта. Оттон 1990 сылларга бэйэтэ туспа спорт биир көрүҥэр тиийэ улааппыта. Биһиги Сахабыт сиригэр бу хаамыы кэлиэҕиттэн, сааһыттан тутулуга суох туһалааҕын билэн, бары көлүөнэ хаамар дьарыга буолла.