Уус Майаҕа "Кэнчээри" уһуйаан төрөппүттэри кытта ситимнээхтик үлэлиир

Уус Майа улууһун Эдьээн национальнай нэһилиэгэр 6 сыллааҕыта бөһүөлэккэ саҥа оҕо уһуйаана улэҕэ киирэн, кырачааннар билигин аныгы ирдэбилгэ толору эппиэттиир оҕо саадыгар сылдьаллар. Төрөппүттэр көмөлөрүнэн, уһуйаан иһигэр түмэл арыллан үлэтин саҕалаабыт.

Олоҕун аҥарын оҕо иитиититигэр анаабыт, улэ бэтэрээнэ Виктория Винокурова үлэ үөһүгэр сылдьар.  Оҕолору кэрэҕэ, сырдыкка угуйар нэһилиэккэ биир тарбахха баттанар киһинэн ааҕыллар.  Кини билигин, буккаас саастаах оҕолорго, улахан бөлөхтөргө иитээччинэн үлэлиир.

"Бу бөлөххө араас саастаах оҕо сылдьар, 5 саастарыттан 7 саастарыгар диэри. Дьарыктанабыт, бырагырааммабыт “Төрүөҕүттэн оскуолаҕа диэри” диэн.  Уонна бэйэбит сахалыы бырагырааммабытынан эмиэ үлэлиибит", - диир "Кэнчээри" оҕо уһуйаанын иитээччитэ Виктория Винокурова.

Оҕо уһуйаанын историята 1958 сыллаахтан саҕаланар. Василиса Атласова туруорсуутунан оҕолор сылдьалларыгар сөптөөх дьиэ булуллан, сопхуос үлэһиттэрин оҕолоругар анаан, оҕолору түүннэри-күнүстэри көрөр-истэр, хаалларар тэрилтэ оҕото арыллар. Ол кэмтэн ыла, 20 кэриҥэ сыл ити эбийиэккэ үлэ баран, 1972 сыллаахха саҥа типовой, 50 миэстэлээх оҕо уһуйаана тутуллан киирэр.

"Кэмниэ кэнэҕэс, хаарбах туруктанан, атын эбийиэккэ көһөргһ күһэллибиппит. Онно үлэлии олордохпутуна, ол эбийиэги эмиэ хаарбаҕынан биллэрэллэр. Киһи олоҕор кутталлаах буолар. Онтон 2010 сылтан саҕалаан, Эдьээҥҥэ оҕо төрөөһүнэ элбэх, саҥа уһуйаан наада диэн туруорсаммын, 2015 сыллаахха таас оҕо уһуйаанын тутуута саҕаламмыта. Уонна дьэ, 2017 сыллаахха, бу үлэлии турар уһуйааммытыгар көһөн киирэммит, үөрэ-көтө үлэлии сылдьабыт", - диэн Кэнчээри" оҕо уһуйаанын сэбиэдиссэйэ Евгения Тимофеева кэпсээтэ.

Таас эбийиэк, аныгы ирдэбилгэ толору эппиэтиир. Сып-сылаас, киэҥ-куоҥ. Сырдык. Оҕолор үөрэ-көтө "үлэлэлэригэр" кэлэллэр. Төрөппүттэри кытта ыкса ситимнээх үлэ барар.

Кыра түмэл оҕото 2 экспозициялаах, сүрүн болҕомто манна - оҕолорго өбүгэ сиэрин-туомун, историятын билиһиннэрии буолар.

Бу курдук Эдьээн нэһилиэгин оҕо уһуйаана төрөппүттэри кытта биир ситимнээх үлэни ыытан, оҕолор эргиччи сайдалларыгар улахан үлэ барар.