Саха сирин чиэһин 37 бөҕөс көмүскүөҕэ

Дьокуускайга 17 сыл буолан баран, 21 диэри саастаах бөҕөстөргө көҥүл тустууга бүтүн Россиятааҕы бастыыр иһин күрэхтэһии ыытыллар. Бу улахан түһүлгэҕэ Саха сирин чиэһин 37 спортсмен көмүскүөҕэ. Күрэхтэһии буолуон иннинэ Өрөспүүбүлүкэ сүүмэрдэммит хамаандатыгар тустаах таҥаһы-сабы туттарыы тэрээһинэ буолла.

Бүгүҥҥү күнтэн саҕалаан, киин куоракка ыччат бүтүн дойдутааҕы күрэхтэһиитэ саҕаланна. Бүгүн ыйааһыннарынан испииһэктэри чопчулуохтара, судьуйалар мунньахтыахтара, итиэннэ киэһээ өттүгэр бары ыйааһын категорияларыгар сэрэбиэй тэрээһинэ барыаҕа. Күрэхтэһии 3 күн устата ыытыллыаҕа. Россия Первенствотыгар барыта 40 регионтан бастыҥтан бастыҥнар кэлэн кыттыахтара. Оттон Саха сирин чиэһин 37 бөҕөс көмүскүөҕэ. 

"Сүүмэрдэммит хамаандаҕа киирбитим үс сыл буолла. Бэйэм 65 киилэҕэ тустаары сылдьабын. Күрэхтэһиигэ бэйэбитин көрдөрүөхпүт диэн көрөөччүлэргэ эрэннэттэриэм этэ", - диир СӨ юниордарга сүүмэрдэммит хамаандатын чилиэнэ Андрей Румянцев.

Күрэхтэһии ыытыллыан иннинэ, сүүмэрдэмит хамаанда чилиэттэригэр - эдэр кэскиллээх бөҕөстөргө тустаах таҥаһы-сабы, экипировканы үөрүүлээх быһыыга-майгыга туттардылар. Тэрээһиҥҥэ Павел Пинигин, спорт миниистирэ Леонид Спиридонов, сүрүн тренер Александр Оконешников, итиэннэ көҥүл тустууга бас-көс уһуйааччылар кытыннылар. Кинилэр уолаттарга туруктара бөҕөх, туохтан да самныбат, кыайыыга дьулуурдаах буолалларыгар ыҥырдылар.

"Салалта, министиэристибэ, федерация уонна үрдүкү маастарыстыба оскуолатын өттүттэн улахани өйөбүл баар. Туох баар усулуобуйа барыта тэрилиннэ. Бу бүгүҥҥү эрэ күрэхтэһиигэ бэлэмнэнии буолбатах. Сылы быһа барда бэлэмнэнии. Чопчу сыал-сорук туруорунан, дойдубутугар буолар күрэхтэһиигэ эппиэттээхтик, түмүктээхтик уонна ситиһиилээхтик кыттарга хамаанда бэлэм диэн сыана биэрэбин", - диэн көҥүл тустууга СӨ үтүөлээх тренерэ Иван Сивцев иһитиннэрдэ.

Санаан эттэххэ маннык күрэхтэһиини Дьокуускай 17 сыл буолан баран иккистээн көрсөр. Ол курдук 2006 сыллаахха Кыайыы 50 сыла Спорт Дыбарыаһыгар буолбута. Ол күрэхтэһиигэ Саха сирин хамаандата 6 мэтээли ылбыта. Былаан быһыытынан бу күрэхтэһии Дьокуускайга буолбакка, Калининград куоракка ыытыллыахтааҕын анарааҥҥылар аккаастаан, биһиги республикабыт киин куоратыгар ыытары быһаарбыттара, Саха сиригэр физкультурнай хамсааһын 100 сылыгар дьоһун бэлэх быһыытынан сыаналанар.

"Бүгүҥҥү түмүгүнэн, кинилэр элбэх хомуурдары оҥордулар. Ол курдук, Дагестаҥҥа даҕаны, атын да регионнарынан сырыттылар. Уонна Саха сиригэр эмиэ бэлэмнэннилэр. Бүтэһик бэлэмнэнии үлэлэрин, манна Триумфка оҥордулар, дьиэлэригэр-уоттарыгар. Билигин кыттарга бэлэмнээхтэр диэн этэбит. Быйыл хамаандабыт сүрдээх күүстээх, эрэллээх үчүгэй уолаттардаахпыт", - диэн СӨ спордун миниистирэ Леонид Спиридонов бэлиэтээн эттэ.

Ити курдук, уолаттар бу дьоһун күрэхтэһиигэ бэлэмнэнэн, 3 түһүмэхтээх анал үөрэтэр-эрчийэр түмсүүнү ааспыттара. Ол иһигэр, олимпийскай чемпион Роман Дмитриев кэриэһигэр норуоттар икки ардыларынааҕы турнирга кыттыбыттара.

3 күн устата ыытыллар күрэхтэһиигэ киирии босхо буолуоҕа. Онон спорду таптааччылар, тустууну сэҥээрээччилэр уолаттарбытыгар, инники эрэллэрбитигэр кэлэн ыалдьарга ыҥыраллар.